काठमाडौं । संसारभर पछिल्लो समय गर्मी बढेको छ । अहिले विश्वका अधिकांश भागमा औसतभन्दा बढी तापक्रम भएको पाइएको छ । मौसमविद्ले यसमा विश्वव्यापी उष्णता (ग्लोबल वार्मिङ)लाई कारण मानेका छन् ।

कतिपय स्थानमा पहिलाभन्दा बढी चिसो पनि महसुस गरिएको छ । तर, धेरै स्थानमा औसतभन्दा बढी तापक्रम देखिएको छ । बीबीसीको मौसम युनिटका अनुसार, यो अवस्था भनेको मौसम परिवर्तनको संकेत हो ।

भीषण गर्मीका कारण सन् २००३ मा युरोपमा करिब ३० हजार मानिसको मृत्यु भएको थियो । यस्तो क्रम लामो समयसम्म चल्दा जंगलमा डढेलोलगायत समस्या निम्तिएको छ । क्यालिफोर्निया क्षेत्रमा त्यस्तो समस्या देखिएको थियो । अहिले उत्तरी अमेरिका, दक्षिणी र पूर्वी एसिया तथा दक्षिणपूर्वी युरोपमा अत्यधिक तापक्रम देखिएको छ ।

उत्तर अमेरिका
पाँचमध्ये एक अमेरिकी अर्थात् ७० मिलियन मानिसले अहिले अधिक तापक्रमको अलर्ट व्यहोरिरहेका छन् । यस्तो चेतावनी क्यानडाका चार प्रान्त न्यु ब्रन्स्वीक, नोभा स्कोटिया, ओन्टारियो र क्युबेकले पनि व्यहोरिरहेका छन् ।

भारत
उत्तरी भारतले हालै एक हप्ता लामो ‘हिट वेभ’ भोग्यो । त्यहाँको तापक्रम ४४ देखि ४५ डिग्री सेल्सियसको हाराहारीमा थियो । तातोसँगै ऊर्जाको खपत पनि बढेको छ । भारतमा गएको मार्चमा गर्मीयाम सुरु भएयता दर्जनौँ मानिसको मृत्यु भइसकेको छ ।

उत्तर प्रदेश र उडिसामा मात्र यो महिनाको सुरुमा तीन दिनको अन्तरमा ५० जनाको मृत्यु भएको थियो ।

साउदी अरेबिया
हज गर्न गएका मुस्लिम समुदायको ठूलो संख्यामा अत्यधिक गर्मीका कारण मृत्यु भएको छ । एएफपीका अनुसार, हज गर्न गएका करिब एक हजारभन्दा बढी तीर्थयात्रीको यसक्रममा मृत्यु भइसकेको छ ।

ग्रीस
युरोपेली मुलुक ग्रीसमा पनि हिट वेभका कारण केही व्यक्तिको मृत्यु भएको छ । अत्यधिक तापक्रमका कारण केही पर्यटकको समेत मृत्यु भएको छ । तीमध्ये ब्रिटिस टीभी र रेडियोका प्रस्तोता माइकल मोस्ली पनि थिए ।

त्यहाँ स्कुल बन्द गरिएको छ । लेस्भोस आइल्यान्डमा आगलागीको घटना पनि भएको छ । गर्मीमा अधिक हिट ग्रीसका निम्ति अनौठो भने होइन । मौसमविद्ले हाल उत्तरी अफ्रिकाबाट आएको वायुले तापक्रम माथि धकेलिरहेको जनाएका छन् । बीबीसीबाट ।