![भारतीय पर्यटकलाई नेपालमा डाँकाको जस्तो व्यवहार गरियो : धवलशमशेर राणा](https://12khari.top/uploads/posts/dhawal-samser-rana1-1717319044.jpg)
काठमाडौं । राष्ट्रिय प्रजातन्त्र पार्टीका सांसद धवलशमशेर राणाले भारतीय पर्यटकलाई नेपालमा डाकाको जस्तो व्यवहार गरिएको बताएका छन् । शुक्रबार प्रतिनिधिसभा बैठकमा उनले भारतीय पर्यटकहरू भू–मार्ग हुँदै नेपालमा आउँदा डाँकाको जस्तो व्यवहार गरिएको बताएका हुन् ।
भारतीय पर्यटकलाई कडाइपूर्वक चेकिङ गरिने गरेको बताउँदै उनले पर्यटकलाई इज्जतका साथ स्वागत गर्नुपर्ने भन्दै सरकारको ध्यानाकर्षण गराए । सांसद राणाले भारतीय नोट हजार र पाँच सयको ल्याएमा सशस्त्र प्रहरीले बोर्डरमै दुर्व्यवहार गर्ने गरेको भन्दै त्यस्तो नहुने व्यवस्था मिलाउन सरकारसँग आग्रह गरे
“हामी छिमेकी मुलुकका पर्यटकहरुलाई धेरै वास्ता गर्दैनौँ । अहिले चीन र भारतका पर्यटकले विश्व छाएका छन् । हाम्रा त अगल–बगलमा छन् । तर, हामीले सहजीकरण गर्दैनौँ । ल्यान्ड रुटबाट भारतीय पर्यटक मोटरमा आउँदाखेरि नेपालमा डाका पसेजस्तो व्यवहार गरिन्छ । १० ठाउँमा चेकिङ गरिन्छ,” उनले भने, “यसमा सरकारले ध्यान दिनुपर्छ । हामीले के नियम गरेको छौँ ? ५०० रुपैयाँ र हजार रुपैयाँभन्दा कमको मात्रै भारु नोट ल्याउन पाइन्छ । ५०० को नोट ल्यायो भने बोर्डरमा सशस्त्रले समातेर दुर्व्यवहार गर्छ ।”