मकवानपुर । पछिल्लो एक वर्षको अवधिमा वाग्मती प्रदेशमा विपद्का विभिन्न घटनामा परी ६१ जनाको मृत्यु भएको छ । गत वर्षको जेठदेखि हालसम्म प्रदेशमा भएका ८३६ विपद्का घटनामा ६१ जनाको मृत्यु भएको हो ।

सो अवधिमा ६१ जनाको मृत्यु, १७७ जना घाइते हुनुका साथै तीनजना बेपत्ता भएका प्रदेशको आन्तरिक मामिला तथा कानुन मन्त्रालयका अधिकृत रविता कार्कीले जानकारी दिइन् । उनले सोही अवधिमा भएका घटनामा करिब  ५१ करोड रुपैयाँका साथै १७८ पूर्वाधारको क्षति भएको बताइन् । 

विपद्‌मा परेर ६३१ पशुचौपाया मरेका मन्त्रालयले जनाएको छ । “प्रदेशमा ४९७ आगलागीका घटना, १२३ स्थानमा वन डढेलो, १९८ स्थानमा पहिरो गएका छन्,” अधिकृत कार्कीले भनिन्, “४२ जनावर आंतक, १६ भारी वर्षा भएको तथ्यांक छ । त्यस्तै बाढी १२, हुरी ११, अन्य गैरप्राकृतिक विपद् तीन, सर्पदंश तीन, हिमपहिरो तीन र एक पटक भूकम्प गएको तथ्या‌ंक मन्त्रालयसँग छ ।”

वाग्मती प्रदेश विपद्को दृष्टिकोणले बहुप्रकोपका रूपमा उच्च जोखिममा रहेको कार्कीले बताइन् । नुवाकोट, सिन्धुपाल्चोक, मकवानपुर, ललितपुर र काभ्रेपलाञ्चोकमा सबैभन्दा बढी पहिरोका घटना भएको उनले जानकारी दिइन् । 

१० वर्षको तथ्यांक हेर्दा सोही अवधिमा ११ हजार ८५२ जनाको मृत्यु भएको छ । उक्त समयावधिमा भूकम्पमा परेर आठ हजार ३७०, आगलागीमा ४६९, बाढीमा एक हजार १२८ र पहिरोमा एक हजार ८८५ जनाको मृत्यु भएको अधिकृत कार्कीले जानकारी दिइन् । 

विपद्‌मा परेर ११ लाख ९९ हजार ६१६ मानिस प्रभावित बनेका छन् भने पाँच लाख चार हजार निजी घर क्षतिग्रस्त भएका तथ्यांकमा उल्लेख रहेको छ । १० वर्षको अवधिमा विपद्‌मा परेर प्रदेशमा सात खर्ब रुपैयाँको क्षति भएको कार्कीले बताइन् । उनका अनुसार भूकम्प, आगलागी, बाढी र पहिरोका कारण सात खर्ब ६५ अर्ब ७९ करोड ८८ लाख ४० हजार रुपैयाँ बराबरको क्षति भएको छ । रासस