काठमाडौं । नेपाल मजदुर किसान पार्टीका सांसद प्रेम सुवालले सरकारले स्थानीय तहलाई बजेट विनियोजन नगरेको भन्दै असन्तुष्टि व्यक्त गरेका छन् । मंगलबार संघीय संसद् भवन परिसरमा सञ्चारकर्मीसँग उनले यस्तो बताएका हुन् ।

स्थानीय तहलाई बजेट विनियोजन गरेर विकास, निर्माणको काम गरिनुपर्नेमा उनले जोड दिए । उनले सरकारले त्यसानुसारको बजेट स्थानीय तहलाई विनियोजन नगरेको बताए । संघ र प्रदेशले स्थानीय तहको अधिकारलाई हस्तक्षेप गर्न नमिल्ने उनले उल्लेख गरे ।

“अब स्थानीय तहको स्वायत्तता र विकेन्द्रीकरण भन्ने छ । अहिले स्थानीय तहलाई सरकारले बजेट नै पठाएन । स्थानीय तहमार्फत देशको बजेट ५० प्रतिशत विनियोजन गरेर विकास निर्माण गर्नुपर्ने हुन्छ,” उनले भने, “त्यो सबै तहको लागि त्यही ढंगले हेरिनुपर्छ । संघ र प्रदेशले स्थानीय तहको अधिकारलाई हस्तक्षेप गर्न मिल्दैन ।”

सांसद सुवालले स्थानीय तहको स्वायत्तता र विकेन्द्रीकरण भन्ने संवैधानिक व्यवस्था भएकाले त्यसानुसार संघ र प्रदेश सरकारले व्यवहार गर्नुपर्ने बताए । न्युज एजेन्सी नेपाल