जेरुसेलम । अन्तर्राष्ट्रिय फौजदारी अदालत (आईसीसी)मा इजरायली प्रधानमन्त्री र हमासका नेतालाई एउटै पंक्तिमा राखेर पक्राउ पुर्जी जारी गर्न आग्रह गर्दै अभियोजकले निवेदन दिएपछि अन्तर्राष्ट्रियजगत्मा हल्लीखल्ली मच्चिएको छ ।

आईसीसीका अभियोजक करिम खानले गाजा क्षेत्रमा नरसंहार भएकामा इजरायलका प्रधानमन्त्री बेन्जामिन नेतान्याहू र हमासका नेता यहया सिनवारविरुद्ध पक्राउ पुर्जी जारी गर्न माग गर्दै निवेदन दिइएको जनाएका थिए । त्यसबारे कडा प्रतिक्रिया दिँदै नेतान्याहूले गाजा संकटका बारेमा हमासका नेताकै कोटीमा राखेर आफूलाई समेत पक्राउ पुर्जी जारी गर्न निवेदन दिइएको भन्दै निन्दा गरेका छन् ।

नेतान्याहूले प्रजातान्त्रिक इजरायललाई आमहत्यारा हमाससँग तुलना गर्नु घृणित कार्य भएको जनाएका छन् ।

यसैबीच, आईसीसीका अभियोजकको भनाइप्रति अमेरिकी राष्ट्रपति जो बाइडेनले पनि आपत्ति जनाएका छन् । इजरायल र हमासबीच समानता नभएको उनले उल्लेख गरेका छन् ।

अमेरिकी विदेशमन्त्री एन्टोनी ब्लिंकेनले वासिङटनले यो विषयलाई आधारभूत रूपमा अस्वीकार गर्ने बताएका छन् । यो लाजमर्दो भएको र उक्त विषय आईसीसीको अधिकार क्षेत्रभित्र नपर्ने उनले जनाएका छन् ।

हमासले पनि इजरायल र आफूलाई एकै ठाउँमा उभ्याउनु पीडित र पीडकलाई समान सोच्नुजस्तै भएको भन्दै आलोचना गरेको छ ।

आईसीसीले पक्राउ पुर्जीको सूचीमा राखेका इजरायलका प्रधानमन्त्री नेतान्याहू अमेरिकाको गठबन्धनभित्र पर्छन् । हमासलाई अमेरिकाले आतंककारीको सूचीमा राखेको छ । यो खालको तुलनाले गर्दा अहिले विश्वभरि नै हल्लीखल्ली र ध्रुवीकरणको अवस्था सिर्जना भएको हो ।

पश्चिमा गठबन्धनमा फुट
यसैबीच, नर्थ एटलान्टिक सन्धि संगठन (नेटो)को संस्थापक राष्ट्र फ्रान्सले भने इजरायल र अमेरिकाको पक्ष नलिई पछिल्लो मामिलामा आईसीसीको समर्थन गरेको सीएनएनले जनाएको छ ।

सन् १९४९ अप्रिल ४ मा नेटो स्थापना हुँदाका संस्थापक १२ राष्ट्रमा बेल्जियम, क्यानडा, डेनमार्क, फ्रान्स, आइसल्यान्ड, इटाली, लक्जेम्बर्ग, द नेदरल्यान्ड्स, नर्वे, पोर्चुगल, बेलायत र अमेरिका थिए । अहिले नेटोमा ३२ राष्ट्र सदस्य छन् ।

फ्रान्सको विदेश मन्त्रालयले सोमबार अबेर जारी गरेको वक्तव्यमा फ्रान्सले अन्तर्राष्ट्रिय अदालतको स्वतन्त्रता तथा यसको दण्डहीनताविरुद्धका सबै अवस्थाको लडाइँमा आफ्नो साथ रहने जनाएको छ ।

आईसीसीले यसबारेमा फैसला भने गरिसकेको छैन । फैसला गरेर पक्राउ पुर्जी नै जारी गरे अन्तर्राष्ट्रिय रोम विधान अनुमोदन गर्ने विश्वका १२४ देशमा गएका बेला इजरायलका प्रधानमन्त्री पक्राउ पर्न सक्नेछन् ।

युक्रेनविरुद्धको युद्धका कारण रुसी राष्ट्रपति भ्लादिमिर पुटिनलाई यसअघि नै आईसीसीले पक्राउ पुर्जी जारी गरिसकेको छ । त्यसैले पुटिन पछिल्लो समय आफूनजिकका मुलुकबाहेक अन्यत्र गएको पाइएको छैन ।

इजरायलले रोम विधान अनुमोदन गरेको छैन । तर, प्यालेस्टाइन पक्षले रोम विधान अनुमोदन गरेका कारण इजरायली प्रधानमन्त्री पनि तानिने अवस्था आएको हो । इजरायलविरुद्ध दक्षिण अफ्रिकाले आईसीसीमा उजुरी दिएको थियो । बीबीसी र सीएनएनबाट ।