काठमाडौं । प्रधानमन्त्री पुष्पकमल दाहाल ‘प्रचण्ड’ले सोमबार चौथोपटक विश्वासको मत प्राप्त गरेका छन् । उनले प्रतिनिधिसभाबाट विश्वासको मत पाएका हुन् । उनका पक्षमा १५७, विपक्षमा शून्य र एक सांसद तटस्थ रहे । प्रतिपक्ष दलका कोही पनि सांसद विश्वासको मतको प्रक्रियामा सहभागी भएनन् ।

त्यसअघि, मर्यादापालकले सुरक्षा दिई प्रधानमन्त्रीलाई विश्वासको मत माग्न रोस्ट्रममा पुर्‍याएका थिए । सोमबार प्रतिनिधिसभाको दोस्रो बैठक सुरु हुनासाथ सभामुख देवराज घिमिरेको आग्रहमा मर्यादापालकले उनलाई रोस्ट्रममा पुर्‍याएका हुन् ।

प्रमुख प्रतिपक्ष नेपाली कांग्रेससहितका सांसदले सोमबारको प्रतिनिधिसभा बैठक सञ्चालनमा पनि अवरोध गरेका थिए । सभामुखको आसनअगाडि वेलमा ओर्लिएर उनीहरूले नाराबाजी गरेका थिए । उनीहरूको अवरोधका कारण प्रधानमन्त्री प्रचण्ड मर्यादापालकको सहयोगमा रोस्ट्रममा पुगेका हुन् । मर्यादापालकले कांग्रेस सांसदलाई छेकेका थिए ।

विपक्षी सांसदको नाराबाजीबीच प्रधानमन्त्रीले विश्वासको मत मागे र पाए । उनीहरूले नाराबाजी गरिरहे ।

सहकारीको बचत अपचलनमा उपप्रधान एवं गृहमन्त्री रवि लामिछाने संलग्न रहेको भन्दै कांग्रेसले छानबिनका निम्ति संसदीय समिति गठनको माग गरिरहेको छ । संसदीय समिति बनाएर मात्र विश्वासको मत लिन कांग्रेसले प्रधानमन्त्रीलाई आग्रह गरेको थियो । तर, समिति नबनाई विश्वासको मत मागिएको भन्दै बैठक सञ्चालनमा अवरोध गरिएको हो ।

विश्वासको प्रस्तावमाथिको छलफलमा नेकपा (एमाले)का सांसद विष्णु पौडेललाई मात्र सहभागी गराइएको थियो । त्यसपछि सभामुख घिमिरेले सिधै प्रधानमन्त्रीलाई जवाफका निम्ति समय उपलब्ध गराएका थिए । प्रधानमन्त्री प्रचण्डले वेलमा नाराबाजी गरिरहेका कांग्रेस सांसदलाई चर्को मूल्य चुकाउनुपर्ने चेतावनी दिएका थिए । प्रधानमन्त्रीले जवाफ दिएलगत्तै मत विभाजनको प्रक्रिया अगाडि बढाइएको थियो ।

थप तस्बिर हेर्नोस्–