काठमाडाैं । सत्ता साझेदार नेकपा (एकीकृत समाजवादी)का अध्यक्ष माधव नेपालले प्रधानमन्त्री पुष्पकमल दाहाल ‘प्रचण्ड’लाई विश्वास मत दिने बताएका छन् । आइतबार पेसागत महासंघको कार्यक्रममा उनले पार्टीमा कुनै समस्या नरहेको पनि बताए । 

“हामी सरकारमा छौँ । हामीले विश्वासको मत नदिने प्रश्नै उठ्दैन । यहाँ कसैले शंका, उपशंका नगरे हुन्छ । कुनै इफ, कुनै बट छैन । विथआउट रिजर्भेसन यो सरकारलाई विश्वासको मत उपलब्ध हुनेछ,” उनले भने । 

प्रधानमन्त्री प्रचण्डले सोमबार (भोलि) विश्वासको मत लिने तयारी गरेका छन् । अध्यक्ष नेपालले आइतबार बिहान प्रधानमन्त्रीसँग कुराकानी भएको सुनाए । उनले सदनको अवरोध हटाउनु नै सबैको हितमा हुने बताए । 

 “आजै मेरो प्रधानमन्त्रीसँग कुराकानी भयो । संसद् अवरोधका विषयमा पनि कुराकानी भयो । अवरोध हटाउने विषयमा मेरो राष्ट्रिय स्वतन्त्र पार्टीका नेताहरूसँग पनि कुराकानी भयो,” उनले भने, “अन्य पक्षसँग कुराकानी भयो, नेपाली कांग्रेससँग पनि भयो । यो अवरोध पन्छाउनु नै सबैको हितमा हुन्छ । ”

सहमतिका साथ अघि नबढे ठूलो संकटमा परिने उनको भनाइ छ । “अहिले सहमतिका साथ जानु नै बेस हुन्छ । नभए ठूलो संकटमा हामी पर्छौंं ,” उनले भने, “नीति कार्यक्रममा छलफल गर्ने ढोका नखोल्ने हो भने के–के समस्या खडा हुन्छन् भन्ने कुरा ध्यानमा राख्नुपर्छ ।”