काठमाडौं । अभिनेता हरिवंश आचार्यले नेपाली चलचित्रको प्रतिस्पर्धा विदेशी सिनेमासँग हुनुपर्ने बताएका छन् । शनिबार चलचित्र ‘महाजात्रा’ प्रदर्शनको ५१औँ दिनका अवसरमा आयोजित कार्यक्रममा उनले यस्तो बताएका हुन् ।

उनले ‘महाजात्रा’ दुई/तीन हलमा एक सय दिनसम्म पनि चल्न सक्ने अनुमान गरे । ५१औँ दिनसम्म देशभरका १३ सिनेमा हलमा उक्त चलचित्र प्रदर्शन भइरहेको उनले जानकारी गराए ।

उनले नेपाली चलचित्रको प्रतिस्पर्धा स्वदेशीसँग नभई विदेशी सिनेमासँग हुनुपर्नेमा जोड दिए । अर्बौँ खर्चिएर बनाइएका चलचित्रलाई करोड रुपैयाँ लगानीका नेपाली सिनेमाले जित्नुपर्ने उनले बताए ।

“...हामीले प्रतिस्पर्धा गर्ने अब विदेशी फिल्मसँग हो । विदेशी फिल्मसँग नेपाली फिल्मले प्रतिस्पर्धा गर्नुपर्छ । उनीहरूले धेरै पैसा, अर्बौँअर्ब खर्च गरेर बनाएका चलचित्रलाई हामीले करोड खर्च गरेर बनाएको चलचित्रले जित्नुपर्छ,” उनले भने, “हाम्रो मुख्य प्रतिस्पर्धा विदेशी चलचित्रसँग हो । स्वदेशी चलचित्रसँग हामी प्रतिस्पर्धा गर्नु हुँदैन । नेपाली चलचित्रको टिमले विदेशी चलचित्रको टिमलाई जित्नुपर्छ ।”

चलचित्र निर्माताले मिठो पकाएर पस्किए मात्र दर्शकले रुचाउने उनले टिप्पणी गरे । “दर्शकले जे पस्किएर दिए पनि खानुहुन्छ भन्ने सोच्नु हुँदैन,” उनले भने, “आफूले पनि मिठो चिज पकाएर पस्किनुपर्छ । दर्शकलाई राम्रो चिज चढाउन सक्नुपर्छ ।” न्युज एजेन्सी नेपाल