काठमाडौं । संस्कृति, पर्यटन तथा नागरिक उड्डयनमन्त्री हितबहादुर तामाङले पशुपति क्षेत्र विकास कोषलाई राजनीति गर्ने थलो बन्न नदिने बताएका छन् । शुक्रवार पशुपति क्षेत्र विकास कोषको ३८औँ वार्षिकोत्सव कार्यक्रममा बोल्दै मन्त्री तामाङले कोषलाई राजनीतिक स्वार्थ पूरा गर्ने थलोको रूपमा हेर्न नहुने बताए । 

विगतमा पशुपति विकास कोष गैरराजनीतिक आध्यात्मिक थलो भएको भन्दै उनले पछिल्लो समय कोष राजनीति गर्ने थलोको रूपमा प्रयोग भए पनि अब त्यस्तो हुन नदिने प्रतिवद्धता जनाए । 

“नेपालको विकास समृद्धि राजनीतिक नेतृत्व गैरराजनीतिक ठाउँमा आएर राजनीतिक गर्नाले हुन सकेन । पशुपति क्षेत्र गैरराजनीतिक आध्यात्मिक पवित्र थलो हो । धार्मिक उद्देश्य प्राप्तिको निम्ति काम गर्ने हो । तर, पशुपति क्षेत्र विकास कोषमा राजनीतिक बढी गर्न थाल्यौँ भने हाम्रो देश नबिग्रे अरु कुन देश र मानिसरू बिग्रछन् । त्यसबाट बच्नुपर्छ भन्ने कुरामा आफू सचेत छु,” उनले भने ।

गैरराजनीतिक ठाउँमा आएर राजनीति गर्नाले नेपालको विकास हुन नसकेको उनको भनाइ छ । पशुपति क्षेत्र विकास कोष गैरराजनीतिक आध्यात्मिक पवित्र थलो भएकाले आफूले धार्मिक उद्देश्य प्राप्तिको निम्ति काम गर्ने उनको प्रतिबद्धता छ । मन्त्री तामाङले पशुपति क्षेत्रलाई व्यवस्थित प्रवद्र्धन गर्नसके धार्मिक पर्यटकहरूको आकर्षणको केन्द्र बन्ने बताए । 

उनले करोडौं जनसंख्या भएको हिन्दुधर्मप्रति आस्था राख्ने भारतका हिन्दु धर्मावलम्बीहरूलाई सहज रुपमा भित्र्याउन पशुपति क्षेत्रमा धार्मिक पर्यटकका लागि रमणीय भौतिक र आध्यात्मिक परिवेश बनाउन आवश्यक रहेको बताए ।