तेल अभिभ । इजरायलको मिलिटरी इन्टेलिजेन्स (सैन्य गुप्तचर) प्रमुखले पदबाट राजीनामा दिएका छन् । गएको अक्टोबर ७ मा हमासद्वारा अप्रत्यासित रूपमा गरिएको आक्रमणको सूचना प्राप्त गर्न नसकेका कारण सो असफलताको जिम्मेवारी लिएर सोमबार पदबाट राजीनामा दिएका हुन् ।

इजरायलको इतिहासमै सबैभन्दा भयानक आक्रमणको रूपमा लिइएको सो आक्रमण रोक्न नसकेको जिम्मेवारी लिँदै उच्च सैन्य अधिकारी मेजर जनरल आहरोन हलिभाले राजीनामा दिएका हुन् । हमासले सो दिन झण्डै एक घण्टा कुनै चुनौतीबिना नै एक हजार २०० मानिसको हत्या गरेको थियो । त्यसमा अधिकांश सर्वसाधारण नागरिक थिए । हमासले करिब २५० जनालाई बन्धक पनि बनाएको थियो । 

सेनाले हलिभाको राजीनामा स्वीकृत गर्दै ३८ वर्षको सेवाका लागि धन्यवाद दिएको छ । उनको राजीनामा पहिला नै अपेक्षित भए पनि अहिलेको समय किन राजीनामाको लागि रोजियो भन्ने कुरा भने खुलेको छैन । एपी