काठमाडौं । सिटिजन्स बैंक इन्टरनेसनल लिमिटेडले १७औँ वार्षिकोत्सवको अवसरमा घरबारविहीन सडकमा आश्रित बालबालिकाहरूलाई खानाको साथै निःशुल्क स्वास्थ्य शिविर आयोजना गरेको छ । गत चैत २० गतेदेखि २०८१ वैशाख ६ गतेसम्म १७ दिन करिब एक हजार ७०० व्यक्तिलाई १७ दिन भोजनको व्यवस्था गरेको हो ।

बैंकले आफ्नो १७औँ वाार्षिकोत्सव वैशाख ७ गते मनाउँदै आएको छ । भोटुःइन्दिरा समाज कल्याण संस्थासँगको सहकार्यमा काठमाडौंको जोरपाटी, चाबहिल, बौद्ध, मैतीदेवी, सेतोपुल, पुरानो बानेश्वर, भीमसेनगोला, बत्तीसपुतली, सिनामंगल, गौशाला लगायतका स्थानमा नदी किनार, सडक छेउमा र पुलमुनी बस्ने घरबारविहीन मानिसलाई बैंकले भोजन वितरण गरेको बताइएको छ ।

सन् २०२० मा कोभिड–१९ को सुरुआतसँगै सडकमा आश्रित घरबारविहीन व्यक्तिहरूलाई खाना खुवाउने कार्यको थलानी गरेको भेटुःइन्दिराले हालसम्म तीन लाखभन्दा बढीलाई खाना खुवाएको बताइएको छ । त्यस्तै, ५०० भन्दा बढीलाई अन्य सहयोग गरिसकेको पनि बताइएको छ । बैंकले वैशाख ६ गते कोसी प्रदेशको धरान शाखाबाट निःशुल्क स्वास्थ्य शिविर सञ्चालन गरी करिब १५० जना सेवाग्राहीलाई निःशुल्क स्वास्थ्य परीक्षण गराएको थियो ।

त्यस्तै, धरान शाखा र महेन्द्रचोक शाखा, मधेस प्रदेशको महेन्दनगर धनुषा शाखा, वाग्मतीको ठिमी, थानकोट, भैंसेपाटी, सामाखुसी, टेकु र नारायणगढ शाखा, कर्णाली प्रदेशको सुर्खेत शाखा, सुदुरपश्चिम प्रदेशको धनगढी र महेन्द्रनगर शाखाहरूबाट  रक्तदान कार्यक्रमको आयोजना गरेको थियो । देशभर विभिन्न शाखामा गरेको रक्तदान कार्यक्रममा २२२ जना दाताले रक्तदान गरेका थिए ।  

सिटिजन्स बैंकले देशैभरी फैलिएका १९० वटा शाखा, १५३ एटीएम र ९८ वटा शाखारहित बैंकिङ इकाईमार्फत सेवा दिँदै आएको छ ।