काठमाडौं । संसद्को गतिरोध अन्त्य गर्न भन्दै सभामुख देवराज घिमिरे दलका प्रमुख सचेतकहरूसँग छलफलमा जुट्ने भएका छन् । सभामुख घिमिरेले सोमबार (भोलि) बिहान १० बजे बैठक बस्ने गरी सचेतकहरूलाई सिंहदरबारमा बोलाएका छन् । प्रमुख प्रतिपक्ष दल नेपाली कांग्रेसका प्रमुख सचेतक रमेश लेखकले बैठक बोलाइएको जानकारी दिए ।

उपप्रधान एवं गृहमन्त्री रवि लामिछाने सहकारी ठगी प्रकरणमा जोडिएको भन्दै कांग्रेसले संसदीय छानबिन समिति गठनको माग गरिरहेको छ । राष्ट्रिय स्वतन्त्र पार्टी (रास्वपा)का सभापति समेत रहेका लामिछाने स्वार्थ बाझिने गरी गृहमन्त्री भएको कांग्रेसको ठहर छ ।

कांग्रेसले लामिछानेलाई पदबाट बाहिर बसेर छानबिन प्रक्रिया सहज रूपमा अघि बढाउन दिन आग्रह गरिरहेको छ । यसअघिका प्रत्येक दिनको संसद् बैठक सुरु भएलगत्तै विशेष समय लिएर कांग्रेस सांसदले सो प्रकरणमा संसदीय छानबिन समिति गठन गर्न माग गरेका थिए ।

प्रतिनिधिसभाको अर्को बैठक यही चैत २७ गते बस्ने तय छ । कांग्रेस महामन्त्री समेत रहेका सांसद विश्वप्रकाश शर्माले छानबिन समिति गठन नगरिए सदन सञ्चालनमा अवरोध हुने यसअघिको बैठकमा आशय व्यक्त गरेका थिए । त्यसैले चैत २७ गतेको संसद् बैठक कसरी सञ्चालन हुन्छ भन्ने भोलि बस्ने सभामुखसहित शीर्ष नेताको छलफलबाट प्रस्ट हुने अनुमान गरिएको छ ।

प्रमुख सचेतक लेखक ‘सरकार हाउस चलाउन तयार छ कि छैन भन्ने जाँच २७ गतेको बैठक हुने’ चेतावनी दिन्छन् । संसदीय छानबिन समिति गठनको विषय कांग्रेसको ‘बटमलाइन’ भएको भन्दै उनी यसलाई कांग्रेसको कमजोरी नठान्न आग्रह गर्छन् ।

“अहिलेसम्म हामीले सदन अवरोध नहोस् भन्ने चाहना राख्यौँ । सरकारले यसलाई कांग्रेसको कमजोरी हो भनेर बुझेको अनुमान गरेको छु । सरकारले यसलाई कमजारीको रूपमा नबुझोस्,” उनले बाह्रखरीसँग भने ।

कांग्रेसले सदन अवरुद्ध गर्न नचाहेको, बैठक प्रभावकारी ढंगले अघि बढाउन चाहेको भन्दै उनी ‘सरकार सदन चलाउन तयार हो कि हैन ?’ भनी प्रश्न गर्छन् । “महामन्त्री शर्मा सांसद मात्र हैन, कांग्रेस महामन्त्री पनि हो । उहाँ बोलेपछि सरकार गम्भीर बन्नुपर्‍यो नि !,” उनले थपे ।

नेपाल वायुसेवा निगमको दुई वाइडबडी विमान खरिद प्रकरणमा भ्रष्टाचार भएको भन्दै अख्तियार दुरुपयोग अनुसन्धान आयोग यति बेला विशेष अदालतमा पुगेको छ । मुद्दा लैजाँदा अख्तियार प्रमुख प्रेम राईलाई भने ‘क्लिन चिट’ दिइएको छ । यो विषयमा पनि कांग्रेस र अरू प्रतिपक्ष दल कसरी प्रस्तुत हुन्छन् भन्ने प्रश्न छ ।

कांग्रेस सचेतक सुशीला थिङ अहिले नै चैत २७ गतेको बैठकमा कसरी प्रस्तुत हुने भन्ने विषयको टुंगोमा पार्टी पुगिनसकेको बताउँछिन् । सरकार जसरी प्रस्तुत हुन्छ, त्यसरी नै बैठकमा उपस्थित हुने नीतिमा कांग्रेस रहेको उनको भनाइ छ ।

“सरकारले वास्ता गरेको छैन । अब पनि सरकारले बेवास्ता गर्ने हो भने २७ गते सदन अवरोध गर्नुपरे पनि प्रतिपक्ष दल तयार हुनुपर्छ भन्ने पक्षमा म छु,” उनले भनिन् ।