काठमाडौं । घरेलु टोली नेपाल ‘ए’लाई पराजित गर्दै आयरल्यान्ड उल्भ्सले एक खेलअगावै ट्वान्टी–२० क्रिकेट शृंखला जितेको छ ।

शृंखलाअन्तर्गत शनिबार भएको दोस्रो खेलमा आयरल्यान्डले नेपाललाई ४० रनले पराजित गर्‍यो । शुक्रबार पहिलो खेलमा आयरल्यान्डले नेपालाई २१ रनले हराएको थियो । योसँगै आयरल्यान्डले तीन ट्वान्टी–२० शृंखला २–० ले आफ्नो पक्षमा बनाएको हो ।

शनिबार आयरल्यान्डले दिएको २२५ रनको लक्ष्य पछ्याएको नेपालले १७.१ ओभरमा सबै विकेट गुमाउँदै १८४ रन मात्र बनाउन सक्यो ।

नेपालका निम्ति देव खनालले सर्वाधिक ४७ रनको योगदान गरे । बसिर अहमद २७, कप्तान विनोद भण्डारी २६, लोकेश बम २५, आरिफ शेख १४ र कमलसिंह ऐरी ११ रनमा आउट भए ।

आयरल्यान्ड उल्भ्सका बेन ह्वाइटले सर्वाधिक तीन विकेट लिए । फिओन ह्यान्ड र थोमस मेयरले दुई/दुई विकेट लिए । म्याथ्यु फोस्टर र  ग्यारेथ डेनालीका नाममा एक/एक विकेट रह्यो ।

त्यसअघि, कीर्तिपुरस्थित त्रिवि क्रिकेट मैदानमा टस हारेर ब्याटिङमा उत्रिएको आयरल्यान्ड उल्भ्सले निर्धारित २० ओभरमा ६ विकेट गुमाउँदै २२४ रन बनाएको थियो ।

आयरल्यान्डका कप्तान निल रकले अविजित रहँदै सर्वाधिक ७१ रन जोडे । पिटर मुरले ६५ रन बनाए । जेम्स जेम्स म्याकोलम २६, रोस अडायर १७ र ग्यारेथ डेनाली १० रनमा आउट हुँदा फिओन ह्यान्ड १९ रनमा अविजित रहे ।

नेपालका सागर ढकालले सर्वाधिक तीन विकेट लिए । कमलसिंह ऐरी र पवन सर्राफले एक/एक विकेट लिए । हिमालयन टेली भ्वाइस