काठमाडौं । भारतको सत्तारुढ दल भारतीय जनता पार्टी (भाजपा-बीजेपी)ले लोकसभा चुनावका उमेदवारको पाँचौँ सूची सार्वजनिक गरेको छ । १११ सिटका लागि अभिनेता अरुण गोविल एवं अभिनेत्री कंगना रनौतलगायत उमेदवार छन् । कंगनाले हिमाचल प्रदेशको मन्डीबाट लोकसभा चुनावमा उठ्ने भएकी छन् । 

रामायण सिरिजमा रामको भूमिका निभाएका अभिनेता अरुण गोविललाई बीजेपीले उत्तर प्रदेशको मेरठबाट उमेदवार बनाएको छ ।

यस्तै, मेनका गान्धीलाई पनि उत्तर प्रदेशकै सुल्तानपुरबाट टिकट दिइएको छ । अभिनेता रवि किशन गोरखपुर लोकसभा निर्वाचन क्षेत्रबाट चुनाव लड्ने भएका छन् । उनी गोरखपुरबाटै बीजेपी सांसद हुन् । भाजपा सांसद एवं बलिउडकी ड्रीम गर्ल भनिने हेमा मालिनी पनि उत्तर प्रदेशको मथुराबाट चुनाव लड्ने भएकी छन् ।

भारतमा आउँदो अप्रिल १९ देखि जुन १ सम्म आम चुनाव हुँदैछ । चुनावबाट लोकसभाका ५४३ सदस्य छानिनेछन् । सात चरणमा चुनाव भएर जुन ४ मा नतिजा सार्वजनिक हुने यो विश्वकै सबैभन्दा ठूलो निर्वाचन हो ।

भारतको एक अर्ब ४० करोड जनसंख्यामध्ये ४४ दिन चल्ने चुनावमा ९६ करोड नागरिक मतदान गर्न योग्य छन् । भारतको संसद् (लोकसभा)को चुनावले नै नयाँ सरकार नेतृत्वमा ल्याउनेछ । चुनावमा भारतीय जनता पार्टी र कांग्रेस नेतृत्वको ४० पार्टी मिलेर बनेको गठबन्धन ‘आईएनडीआईए अर्थात् इन्डिया’ प्रमुख प्रतिस्पर्धी छन् ।