काठमाडौं । सुन तस्करीबारे छानबिन गर्न गठित जाँचबुझ आयोगले नेपाल प्रहरीको केन्द्रीय अनुसन्धान ब्युरो (सीआईबी)का प्रमुख एवं प्रहरी अतिरिक्त महानिरीक्षक (एआईजी) किरण बज्राचार्यसहित चार प्रहरी अधिकारीलाई कारबाहीको सिफारिस गरेको छ ।

गएको असोज १४ गते मन्त्रिपरिषद्को निर्णयबाट गठित आयोगले झन्डै ६ महिला लामो अध्ययनपछि बिहीबार उपप्रधान एवं गृहमन्त्री रवि लामिछानेलाई प्रतिवेदन बुझाएको थियो । गृहमन्त्री रवि लामिछानेले शुक्रबार प्रधानमन्त्री पुष्पकमल दाहाल ‘प्रचण्ड’लाई प्रतिवेदन बुझाएका छन् ।

आयोगले तयार गरेको ४८५ पृष्ठ लामोे प्रतिवेदनको १३औँ अध्यायमा कारबाही सिफारिस गरिएको गृह मन्त्रालय स्रोतले जनाएको छ ।

सुन तस्करीमा संलग्न भएको भनिएका जीवन चलाउनेसँग आयोगले ह्वाट्सएपमार्फत बयान लिएको थियो । उक्त बयानपछि सीआईबी प्रमुख र सुन तस्करीको अनुसन्धानमा संलग्न प्रहरी अधिकारीको भूमिका शंकास्पद देखिएको आयोगको ठहर छ ।

• सुन तस्करीमा जोगाइएका पूर्वसभामुख महरासहित उच्चपदस्थलाई मुद्दा चलाउन सिफारिस

आयोगले अनुसन्धानमा खटिएका सीआईबीका प्रहरी अधिकारीले नै सुन तस्करीका सम्बन्धमा संकलित प्रमाण, सीसीटीभी फुटेज र कागजात गायब पारेर प्रमाण मेटाउन भूमिका खेलेको औँल्याएको छ ।

त्रुटिपूर्ण अनुसन्धान गरेको र सुन तस्करीमा संलग्न व्यक्तिलाई सीआईबीमै बोलाएर बयान लिएपछि कागज गरेर छोड्दै भगाउन भूमिका खेलेको गम्भीर आरोप पनि प्रहरी अधिकारीमाथि लगाइएको छ ।

एआईजी बज्राचार्यसँगै अनुसन्धान समितिमा संयोजकको भूमिका निर्वाह गरेका प्रहरी उपरीक्षक (एसपी) सञ्जयसिंह थापा, प्रहरी उपरीक्षक (डीएसपी)द्वय दुर्गा दाहाल र रुगम कुँवरलाई विभागीय कारबाही सिफारिस गरिएको छ ।

उनीहरूले हङकङबाट ब्रेक सुमार्फत ल्याइएको ६० केजी र दुबईबाट भेपमार्फत तस्करी गरिएको सुनको अनुसन्धानमा संलग्नलाई बचाउन भूमिका खेलेको आयोगको प्रतिवेदनमा उल्लेख छ ।