काठमाडौं । अमेरिकी अन्तर्राष्ट्रिय विकास नियोग (यूएसएआईडी)ले नेपालमा गुणस्तरीय शिक्षामा पहुँच बढाउन करिब ११ अर्ब रुपैयाँबराबरको सहायता घोषणा गरेको छ ।

विशेष गरी सीमान्तकृत युवा र प्रारम्भिक कक्षाका विद्यार्थीकेन्द्रित हुने गरी गुणस्तरीय शिक्षामा नेपालका बालबालिकाको पहुँच विस्तार गर्न यूएसएआईडीले आइतबार उक्त सहायता घोषणा गरेको हो ।

पाँच वर्षको अवधिमा करिब ११ अर्ब रुपैयाँसम्मको सहायता प्रदान गरिने काठमाडौंस्थित अमेरिकी दूतावासले आइतबार जारी गरेको विज्ञप्तिमा उल्लेख छ ।

“उक्त सहायता रकम कोषको उपलब्धतामाथि निर्भर रहनेछ । यस सहायता विस्तारले नेपालका विकास लक्ष्यहरूप्रति नेपाल र अमेरिकाको साझा समर्पणलाई पुनः पुष्टि गर्दै दुई देशबीच विद्यमान साझेदारीलाई थप मजबुत बनाएको छ,” विज्ञप्तिमा भनिएको छ ।

यूएसएआईडीको एसिया ब्युरो हेर्ने वरिष्ठ उपसहायक प्रमुख जेना सलाहीले भनिन्, “यी नयाँ सहायता विस्तारले नेपालका बालबालिकाका लागि ढोकाहरू खोल्न जारी राख्नेछन् र होनहार युवाहरूलाई आफ्नो सम्पूर्ण क्षमता साकार पार्न तथा आफ्ना समुदाय र देशको विकासमा सार्थक रूपमा योगदान पुर्‍याउन मद्दत गर्नेछन् ।”