काठमाडौं । उपप्रधानमन्त्री तथा रक्षामन्त्री पूर्णबहादुर खड्काले अदालतमा विचाराधीन मुद्दाका कारण नेपाली सेनाले जिम्मा लिएको काठमाडौं–तराई/मधेस द्रुतमार्ग निर्माण कार्यले अपेक्षित प्रगति हासिल गर्न नसकेको बताएका छन् ।

शुक्रबार राष्ट्रियसभा बैठकमा सांसदहरूले शून्य र विशेष समयमा उठाएका प्रश्नको जवाफ दिने क्रममा उनले जग्गा प्राप्ति, प्रस्थान बिन्दुको विवादलगायत विषयमा अदालतमा कतिपय मुद्दा विचाराधीन अवस्थामा रहेकाले शो द्रुतमार्गको निर्माण कार्य अपेक्षाअनुसार अघि बढ्न नसकेको बताए । 

उपप्रधानमन्त्री खड्काले थप गरिएको समय २०८३ चैत मसान्तभित्र शो द्रुतमार्गको काम सम्पन्न हुने आश्वासन समेत दिए । द्रुतमार्ग निर्माणको क्रममा देखिएका समस्या समाधानका लागि सरकारले विभिन्न समितिहरू बनाएको र त्यसले ती समस्याहरूलाई समाधान गर्दै आएकाले थप गरिएको समयमा निर्माण कार्यले पूर्णता पाउने तर्क गरे । 

उपप्रधानमन्त्री खड्काले हालसम्म उक्त द्रुतमार्गको काम ३०.९६ प्रतिशत सम्पन्न भइसकेको बताए । 

नेपाली सेनाले जिम्मा लिएको उक्त द्रुतमार्गको काम २०८१ मंसिरभित्र सम्पन्न गरिसक्ने सम्झौता गरिएको थियो ।