काठमाडौं । अर्थमन्त्री डा. प्रकाशशरण महतले अर्थतन्त्रमा सुधारका संकेत देखिएको बताएका छन् । सोमबार प्रतिनिधिसभा बैठकमा आगामी अर्थिक वर्ष २०८१/०८२ को विनियोजन विधेयकका सिद्धान्त र प्राथमिकतामाथि छलफल गरियोस् भन्ने प्रस्ताव पेस गर्दै बैक तथा वित्तीय संस्थामा तरलता सहज हुँदै गएको बताएका हुन् ।

“बैकिङ क्षेत्रतर्फ पर्याप्त तरलता, ब्याजदर एकल विन्दुतर्फ झर्ने क्रममा रहेको तथा निक्षेप र कर्जा प्रवाहमा क्रमशः वृद्धि भएको छ,” उनले भने, “वृत्त र मौद्रिक नीतिलाई एउटै लयमा लैजान गरिएको प्रयासले यो सम्भव भएको हो ।”

अर्थतन्त्र लयमा फर्काउन निजी क्षेत्रसँग गरिएका प्रयासले केही सुधार भएको उनको भनाइ छ । आगामी वर्ष निजी क्षेत्रको लगानी बढाउन वातावरण बनाउने पनि बताए ।

त्यस्तै, तेस्रो लगानी सम्मेलनबाट स्वदेशी र विदेशी लगानीकर्तालाई प्रोत्साहन गरिने पनि बताए । त्यसका लागि आवश्यक कानुन संशोधन गरिने उनको भनाइ छ । सरकारले आगामी वैशाख १६ र १७ गते तेस्रो लगानी सम्मेलन गर्ने तयारी गरेको छ ।