काठमाडौं । राष्ट्रिय स्वतन्त्र पार्टी (रास्वपा)की सांसद सोविता गौतमले वर्तमान सरकार असफल भएको बताएकी छन् । सांसद गौतमले काम गर्न नसकेका मन्त्रीहरूलाई राजीनामा दिन आग्रहसमेत गरिन् ।

आइतबार प्रतिनिधिसभा बैठकपछि सञ्चारकर्मीसँगको कुराकानीका क्रममा सांसद गौतमले सरकारको काम शून्य भएको टिप्पणी गरिन् ।

आफू बिग्रिएको सडक निर्माणको विषयलाई लिएर पटकपटक मन्त्रीलाई आग्रह गर्न जाँदा पनि भेट्न नपाएको उनको गुनासो छ । प्रदेश सरकारले विकास निर्माणको काममा सहजीकरण गर्नुपर्ने भए पनि भूमिका हुन नसकेको  सांसद गौतमको भनाइ छ।

"पटकपटक मन्त्रालयमा मन्त्री भेट्न आउँछु । भेट्न समय दिनुहुन्न । सांसद, जो जनताको आवाज बोकेर आएको छ, जनताको प्रत्यक्ष मत लिएर आएको छ । सांसदलाई भेट्न पनि मन्त्रीहरूले आनाकानी गर्ने । मन्त्रीहरूले भेट्छन् चाहीँ कसलाई ?," उनको आक्रोश थियो ।

उनले ठुला पार्टीहरूले संसद्‌मा एकले अर्कोलाई आरोपित मात्रै गरिरहेको पनि बताइन् ।