गाजा । मध्य गाजापट्टीको नुसिरात शरणार्थी शिरिमा एउटा घरमा इजरायलले पुनः गरेको हवाई आक्रमणमा कम्तीमा १७ प्यालेस्टाइनी मारिएको र ३४ जना घाइते भएको स्थानीय चिकित्सा स्रोतले जानकारी गराएको छ ।

स्रोतले उद्धार प्रयास जारी रहेको र हताहत हुनेमा महिला र बालबालिका पनि रहेका उल्लेख गरेको छ । पीडितलाई देइर अल–बलाह सहरको अल–अक्सा सहिद अस्पतालमा सारिएको छ ।

प्रत्यक्षदर्शीले एक इजरायली युद्धक विमानले धेरै विस्थापित परिवारलाई आश्रय दिइरहेको घरमा अनेकौँ मिसाइल प्रहार गरेको बताएका छन् । ठूलो विस्फोटबाट भवन ध्वस्त भएको र शिविरको पश्चिमी भागमा छिमेकीको घरमा गम्भीर क्षति पुगेको जनाइएको छ ।

यसैबीच, हमासद्वारा सञ्चालित स्वास्थ्य मन्त्रालयले बुधबार विज्ञप्ति जारी गर्दै गाजापट्टीमा इजरायली आक्रमणमा ज्यान गुमाउने प्यालेस्टाइनीको संख्या बढेर २९ हजार ३१३ पुगेको र ६९ हजार ३३३ जना घाइते भएको जनाएको छ । रासस/सिन्ह्वा