गोदावरी । नेपाली कांग्रेसका महामन्त्री विश्वप्रकाश शर्माले पार्टीबाट प्रतिनिधित्व गर्दै सरकारमा सहभागी हुनेहरूको कार्यकालको समयावधि पनि तोक्न प्रस्ताव गरेका छन् । ललितपुरको गोदावरीमा जारी महासमिति बैठकमा उनले कांग्रेसका तर्फबाट राष्ट्रपति, प्रधानमन्त्री, मन्त्री र सांसद कतिपटकसम्म बन्न पाउने भन्ने प्रस्ताव गरेका हुन् ।

“पार्टीको केन्द्रीय या जिल्ला समितिको सभापति पदमा दुईपटक मात्र जिम्मेवारी सम्हाल्न पाउने प्रावधान नेपाली कांग्रेसले सुरु गरेर कार्यान्वयनमा लगिसकेको छ,” उनले प्रतिवेदनमा उल्लेख गरेका छन् ।

एक व्यक्ति राष्ट्रपति एक, प्रधानमन्त्री दुई, मन्त्री तीन र सांसद चारपटकसम्म मात्र बन्न पाउने प्रस्ताव उनले गरेका छन् । “अब मुलुकको शासन प्रणालीमा अवलम्बन गर्न जरुरी छ । राष्ट्रपति, प्रधानमन्त्री, मन्त्री र सांसदको कार्यकाललाई १/२/३/४ को सिद्धान्तले बाँध्ने पद्धतिको प्रस्ताव नेपाली कांग्रेस गर्दछ,” उनले प्रस्तावमा लेखेका छन् ।

उनले यो वाचन गरेपछि हलमा सहभागी महासमिति सदस्यहरूले ताली बजाएर समर्थन जनाएका थिए ।

शर्माले एकै घरपरिवारबाट एउटै संसद्को उमेदवार बन्ने परिपाटी आलोचित भएको पनि उल्लेख गरेका छन् । उनले व्यक्तिको स्वतन्त्र अधिकारलाई परिवारको सदस्यसँग जोडेर कुण्ठित गर्न नमिल्ने बताउँदै यस्ता आलोचना हुने अवस्थाको विकल्प सोच्नुपर्नेमा जोड दिएका छन् ।

प्रस्तावको पूर्णपाठ पढ्नोस्–