काठमाडौं । संघीय संसद्को दुवै सदनको हिउँदे अधिवेशन सोमबारदेखि सुरु हुँदै छ । संसद्को हिउँदे अधिवेशन सुरु हुने पूर्वसन्ध्यामा दलहरूले आ–आफ्नो तयारी पनि गरिरहेका छन् । कतिपय दलहरूले यस बीचमा संसदीय दलको बैठक सम्पन्न गरिसके भने केहीको संसदीय दल बैठक चलिरहेको छ ।

दलहरूले संसद्को यस अधिवेशनमा गर्ने कामहरू, दलको तर्फबाट प्रस्तुत गर्ने विषयहरू तथा सांसदहरूले राख्ने विषयहरूको सम्बन्धमा आ–आफ्नो तयारी गरेका छन् ।

प्रमुख प्रतिपक्ष दल नेकपा (एमाले)ले संसद् अधिवेशनमा सुशासनको मुद्दालाई पहिलो मुद्दा बनाएर प्रस्तुत हुने तयारी गरेको छ । देशमा भ्रष्टाचार बढेको र जनतामा निराशा बढेको एमालेको ठम्याइ छ । सरकार जनताप्रति जवाफदेही र उत्तरदायी हुन नसकेका कारण देशमा भ्रष्टाचार बढिरहेको भन्दै एमालेले सुशासनको मुद्दालाई प्राथमिकताका साथ उठाउन लागेको हो ।

एमालेका प्रमुख सचेतक पदम गिरीले सुशासनको मुद्दालाई आफूहरूले पहिलो मुद्दा बनाउने बताए । उनले देशको विकास, सुशासन र समृद्धिको सवालमा एमालेले निरन्तररूपमा सशक्त ढंगले आवाज उठाउने बताए । अहिले देशको राष्ट्रिय स्वाधिनता इतिहासमा सबभन्दा कमजोर स्थितिमा रहेको उल्लेख गर्दै उनले राष्ट्रिय स्वाधिनता र सार्वभौमसत्ताको विषयलाई पनि प्रमुख एजेन्डा बनाउने बताए । धेरै भन्दा धेरै ऐन, कानुनहरू निर्माण गर्न संसद्लाई केन्द्रित गराउने पनि उनको भनाइ छ ।

"धेरै भन्दा धेरै ऐन, कानुनहरू निर्माण गर्न संसद्लाई केन्द्रित गर्नुपर्ने छ । त्यसका लागि हाम्रो तर्फबाट सम्पूर्णरूपले ध्यान केन्द्रित गर्छौं । मुलुकलाई चाहिने असल नीतिहरू, असल कानुनहरू निर्माण गर्नु हाम्रो प्रमुख दायित्व हो । त्यो दायित्वलाई हामी गम्भीरताका साथ लिएर त्यो काममा हामी केन्द्रित हुन्छौँ," उनले भने ।

नेकपा (एमाले) का सचेतक महेश बर्तौलाले संसद्ले कानुन बनाउने काम पाउनुपर्नेमा आफूहरू सचेत रहेको बताए । उनले विगतमा सरकारले संसद्लाई भूमिकाविहीन बनाएको भन्दै आगामी दिनमा पनि त्यसो गरिए सशक्त प्रतिवाद गरिने चेतावनी पनि दिए । सरकारले संविधान र कानुनविपरीत गरेका गतिविधिहरूको संसद्‌मार्फत भण्डाफोर गरिने उनको भनाइ छ ।

"आज स्वाधिनता र सार्वभौमसत्ता, स्वाभिमान माथि नै कयौँ प्रश्नहरू सिर्जना गर्ने गरी विदेशीहरूले आफ्ना स्वार्थ पूरा गर्न नेपालको मञ्च प्रयोग गरेको कुरा सत्य हो । यो पाटोमा गम्भीरताका साथ सदनमा हामीले खबरदारी गर्ने छौँ," बर्तौलाले भने ।

सत्तारूढ प्रमुख दल नेपाली कांंग्रेसकी सचेतक सुशिला थिङले पार्टीले हिउँदे अधिवेशनको प्रारम्भमा संक्रमणकालीन न्यायसँग सम्बन्धित विधेयक र सम्पती शुद्धीकरणसम्बन्धी विधेयकलाई प्राथमिकतामा राखेको बताइन् । उनले आगामी विधेयकहरू पनि महत्त्वको आधारमा ल्याउने बताइन् ।

"कति विधेयक सरकारले ल्याउन सक्छ, त्यसमा हामी लेखाजोखा गर्छौं । त्यसमा पनि महत्त्वपूर्ण टीआरसी विधेयक छ । मनी लाउन्डरिङ विधेयक छ । सुरक्षण मुद्रणसम्बन्धी विधेयक पनि आउँदै छ । त्यसमध्ये पनि अहिले देखिएको टीआरसी विधेयक र मनी लाउन्डरिङ विधेयकलाई विशेष केन्द्रबिन्दुमा राखेको पनि छ । अब आउने विधेयकहरू कुन–कुन महत्वपूर्ण हो त्यसमा विशेष छलफल पछि गर्ने छौँ," उनले भनिन् ।

नेपाली कांग्रेसका सांसद जीवन परियारले आगामी अधिवेशनमा कानुन निर्माणको कामलाई विशेष प्राथमिकता दिनुपर्नेमा जोड दिए । उनले संविधानको मौलिक हक कार्यान्वयनसँग सम्बन्धित धेरै  ऐन, कानुनहरू अझै नबनेका भन्दै ती कानुनहरू बनाउन ध्यान पुर्‍याइने बताए ।

सत्तारूढ नेकपा(माओवादी केन्द्र)का प्रमुख सचेतक हितराज पाण्डेले आगामी अधिवेशन व्यवस्थित र विधेयक केन्द्रित बनाउने गरी तयारी गरिरहेको बताए । उनले कार्यतालिका बनाएर सदनलाई व्यवस्थित गरिने बताए । आगामी अधिवेशनमा सक्रमणकालीन न्यायसँग सम्बन्धित विधेयक, विद्यालय शिक्षा विधेयक, निजामती कर्मचारीसँग सम्बन्धित विधेयकलाई गतिका साथ अगाडी बढाइने पनि बताए ।

"यो अधिवेशनलाई व्यवस्थित र विधेयक केन्द्रित बनाउने गरेर सोचिरहेका छौँ । कार्यतालिका बनाएर सदनलाई व्यवस्थित गर्नेबारे हामी सोचिरहेका छौँ," उनले भने ।

संसद्‌मा जनताका समस्याहरूलाई उठाउने र सरकारले गरेका सकारात्मक कामहरूको चर्चा गर्ने पनि उनले बताए । त्यस्तै, मन्त्रीहरूलाई सरकारको कामका बारेमा संसद्‌मा आएर जानकारी दिन लगाउने उनको भनाइ छ ।

विक्रम रत्न, सुरज प्रधान/न्युज एजेन्सी नेपाल