काठमाडौं । ललितपुरको बालकुमारी घटनाबारे छानबिन गर्न बनेको आयोगले समय अवधि थप्ने भएको छ । गत पुस १३ गते  बालकुमारीमा प्रहरीको गोली लागेर अछामका वीरेन्द्र शाह र दैलेखका सुजन राउतको मृत्यु भएको थियो ।

कोरिया भाषा परीक्षाको फाराम भर्ने विषयमा विवाद हुँदा युवाहरूले भौतिक पूर्वाधार तथा यातायातमन्त्री प्रकाश ज्वाला सवार बा२झ ५८६१ नम्बरको ल्यान्डक्रुजर प्राडो समेत जलाइदिएका थिए ।

सोही विषयको छानबिन गर्न सरकारले पुस १६ मा उच्च अदालत पाटनका पूर्वन्यायाधीश शेखर पौडेलको अध्यक्षतामा नेपाल प्रहरीका पूर्वप्रहरी अतिरिक्त महानिरीक्षक (एआईजी) अरुण बीसी र गृह मन्त्रालयका सहसचिव नारायणप्रसाद भट्टराई सदस्य रहेको जाँचबुझ आयोग गठन गरेको थियो ।

सो आयोगलाई सरकारले एक महिनाभित्र घटनामा भएको मानवीय, भौतिक लगायतका क्षतिको विवरण, घटनामा संलग्नहरूको कमी कमजोरी पत्ता लगाएर कारबाहीका लागि सिफारिस गर्ने कार्यादेश दिएको थियो ।

तर, आयोगले सरकारले दिएको एक महिनाको समय सीमाभित्र काम नसकिने भन्दै थप्ने तयारी गरेको हो ।

“हामीले काम पुस २० गतेदेखि थालेको हौँ । अहिले पनि काम गरी नै राखेका छौँ । सरकारले तोकेको समयसीमाभित्र काम सकिने अवस्था छैन । केही समय थप माग्छौँ,” आयोगका अध्यक्ष पौडेलले भने ।

बालकुमारी घटनामा गृह मन्त्रालयले प्रहरीको कमजोरी देखाउँदै फिल्डकमाण्डमा खटिएका प्रहरी नायव उपरीक्षक (डीएसपी) उमेश लम्साल र मन्त्री ज्वालाका पीएसओ बोधराज दनुवारलाई निलम्बन गरेको थियो ।

त्यस्तै, जिल्ला प्रशासन कार्यालय ललितपुरका प्रमुख रुद्रप्रसाद पण्डित र ललितपुर प्रहरी प्रमुख एसएसपी सिद्धिविक्रम शाह समेतलाई त्यति नै बेला परिवर्तन गरेको थियो ।

युवाहरूले प्रदर्शन गरिरहेको सडकमा मन्त्रीको गाडी जानकारीबिना नै प्रवेश गर्दा घटना भएको प्रहरीको दाबी छ । छानबिन आयोगले फिल्डमा खटिएका प्रहरी अधिकारीसहित एसएसपी शाहसँग बयान लिइसकेको छ ।

मन्त्री ज्वालाको समेत बयान लिने तयारीमा आयोग रहेको अध्यक्ष पौडेलले जानकारी दिए । 

“मन्त्रीज्यूको पनि बयान लिन्छौँ । त्यसका लागि हामीले चिठ्ठी पठाइसकेका छौँ,” अध्यक्ष पौडेलले भने ।

युवाहरूले प्रर्दशन गरिरहेकै बेला पार्टीको बैठकमा सहभागी भएका मन्त्री ज्वाला कोटेश्वर तर्फको विपरीत लेनबाट जान खोज्दा उनको गाडी जलाइएको थियो । त्यो बेला उनका पीएसओ दनुवारले ललितपुर प्रहरीलाई समेत खबर नै नगरी त्यहाँ पुगेको अनुसन्धानका क्रममा खुलेको छ ।