काठमाडौं । समूह चरणको अन्तिम खेलमा इन्डोनेसियाविरुद्ध ३–१ को जित निकाल्दै प्रतियोगिताको सबैभन्दा सफल टोली जापानले एएफसी एसियन कपमा नकआउट चरणमा स्थान बनाएको छ ।

कतारको अल थुमाम रंगशालामा बुधबार छैटौँ मिनेटमा अयासी युडाले पेनाल्टीमा गोल गर्दै जापानलाई अग्रता दिलाएका थिए । ५२औँ मिनेटमा उनैले टोलीको अग्रता दोब्बर बनाए ।

८८औँ मिनेटमा इन्डोनेसियाका जस्टिन हुनबनेरबाट आमत्मघाती गोल हुन पुग्दा जापान ३–० ले अघि बढेको थियो । इन्ज्युरी समयमा इन्डोनेसियाका स्यान्डी वाल्सले गोल गर्दै स्कोरलाई ३–१ मा ल्याए पनि टोलीको हार टार्न सकेनन् ।

जितसँगै जापानले समूह ‘डी’को उपविजेता बन्दै अन्तिम १६ मा स्थान बनाएको हो । उपविजेता जापानले समूह चरणका तीन खेलमा ६ अंक जोड्यो । तीन खेलबाट तीन अंक जोडेको इन्डोनेसियाले तेस्रो स्थानमा रहँदै समूह चरण टुंग्याएको छ । जापानले हालसम्म चारपटक यो प्रतियोगिताको उपाधि जितेको छ ।

यही समूहको अर्को खेलमा भियतनामविरुद्ध ३–२ को पुनरामगन जित निकाल्दै इराकले शीर्ष स्थान हासिल गर्‍यो ।

समूह चरणमा शतप्रतिशत जित निकालेको इराकले नौ अंक जोड्यो । तीनै खेलमा पराजित भियतनामले अंकविहीन बन्दै प्रतियोगिताको अन्त्य गरेको छ ।