काठमाडौं । राष्ट्रिय स्वतन्त्र पार्टी (रास्वपा)की सांसद सुमना श्रेष्ठ तीनवटा प्रश्न लिएर नेपाल मेडिकल काउन्सिल पुगेकी छन् । काउन्सिललाई उनले पछिल्लोपटक मुटुरोग विशेषज्ञ डा. रामेश कोइरालाले सामाजिक सञ्जालमा गरेको टिप्पणीसहित तीनवटा सवालमा लिखितरूपमै प्रश्न गरेकी छन् ।

“हामीले मेडिकल काउन्सिलमा तीन महत्त्वपूर्ण प्रश्नहरू गरेका छौँ– लिंगभेदी भ्रूण हत्याबारे, अस्पतालहरूमा बिरामीको मृत्युपछि कारण खोज्ने प्रक्रियाबारे र बिरामी पक्ष र स्वास्थ्य संस्थाबीच विवाद हुँदा कथित लापरबाही 'मालप्राक्टिस' हो वा होइन भनेर निर्क्यौल गर्नेबारे,” श्रेष्ठले ट्विटरमा लेखेकी छन् ।

पछिल्लो सर्वेक्षणमा छोरा र छोरीको जनंख्यामा ठूलो असन्तुलन देखिएकोबारे माघ ९ गतेको शिक्षा स्वास्थ्य समितिमा समेत सांसद सुमनाले सवाल उठाएकी थिइन् । 

एकसय १२ छोरा जन्मिँदा १०० जनामात्रै छोरी जन्मिनुको पछाडि भ्रूण पहिचान र भ्रूणहत्या मुख्य कारण रहेको र यसको अनुसन्धान काउन्सिलले गर्नुपर्ने माग उनको छ । जसमा काउन्सिलको काम कारबाहीबारे उनले विवरण माग गरेकी छन् ।

उनको दोस्रो प्रश्न भने मुटुरोग विशेषज्ञ डा. रामेश कोइरालाको पछिल्लो अभिव्यक्तिप्रति लक्षित छ । गंगालाल राष्ट्रिय हृदय केन्द्रमा कार्यरत डा. कोइरालाले 'चार बिरामीको उपचारको क्रममा मृत्युलाई सहज मान्दियौँ' भनेको सन्दर्भमा नेपालका अस्पतालमा बिरामीको मृत्युपछि कारण खोज्ने प्रक्रियाबारे बुझ्न चाहेको बताएकी छन् ।

” के यहाँ भएका चार मृत्युलाई साँच्चै सहज नै मानिएको हो,” उनले काउन्सिललाई प्रश्न गरेकी छन् ।

“अस्पतालमा डाक्टर र स्वास्थ्यकर्मीमाथि हुने हिंसात्मक घटनालाई यस्ता अभिव्यक्तिले अझै बल पुर्‍याउन सक्ने हुँदा यसबारे काउन्सिलको धारणा के छ पनि प्रस्ट पार्न अनुरोध छ,” काउन्सिललाई बुझाइएको पत्रमा उल्लेख छ । 

डा. मलख श्रेष्ठको ‘नेपालबाट किन विदेशिरहेका छन् डाक्टर ?’ शीर्षकको लेखमा बुधबार सांसद सुमनाले ‘फर्किने वातावरण बनाउनुपर्छ’ भन्दै रिट्विट गरेकी थिइन् । सो लेखमा सहिद गंगालाल राष्ट्रिय हृदय केन्द्रका कार्डियाक सर्जन डा. रामेश कोइरालाले टिप्पणी गरेका थिए ।

“सन् २००२ मा म गंगालालको सर्जरी विभागको संयोजकमात्र थिएँ र हाम्रामा सो समय लोकसेवा वा मेडिकल अधिकृतबाटै जागिर गर्नु पर्दैनथ्यो । पछि डा. साहेब गंगालाल आउँदा स्वागत गरेर यहाँले अपरेसन गरेका चारै बिरामीको मृत्यु सहज मान्दियौँ पनि ।  प्लिज, म आज विभागीय प्रमुख यहाँलाई सो पद आजै छाड्छु, फर्किने हो,” डा. कोइरालाले भनेका छन् ।

तेस्रो प्रश्नमा सांसद श्रेष्ठले स्वास्थ्यकर्मीको लापरबाहीका कारण बिरामीको ज्यान तलमाथि भएको भन्दै बिरामी पक्ष र स्वास्थ्य संस्थाबीच हुने विवादमा काउन्सिलको भूमिकाबारे प्रश्न गरेकी छन् । जसमा उनले काउन्सिलमा परेका उजुरी र कारबाहीको विवरणसमेत माग गरेकी छन् ।