![स्वास्थ्य क्षेत्रमा उल्लेख्य कार्य, कुल बजेटमध्ये २१ प्रतिशत खर्च](https://12khari.top/uploads/posts/Kedar-karki-1705917584.jpg)
विराटनगर । कोसी प्रदेश सरकारले आफ्नो एक सय दिनको उपलब्धि सार्वजनिक गरेका छन् । गत असोज २७ मा कांग्रेसका केदार कार्की मुख्यमन्त्री नियुक्त भएका थिए ।
मुख्यमन्त्री तथा मन्त्रिपरिषद्को कार्यालयमा आज पत्रकार सम्मेलन आयोजना गरी कार्कीले सरकार गठन भएपछि आफ्नो नेतृत्वमा गरेका काम सार्वजनिक गरेका हुन् । कार्कीले कानुन निर्माणदेखि भौतिक पूर्वाधार, शिक्षा, स्वास्थ्य लगायतका क्षेत्रमा सरकारले गरेका कामबारे जानकारी गराए ।
सरकारले प्रदेश राजधानी विराटनगरमा शैलजा आचार्य हृदयरोग केन्द्र सञ्चालनमा ल्याएको बताए । कार्कीले सुनसरीको इटहरी उपमहानगरपालिका–११, पकलीमा एक सय शय्याको जलन अस्पताल निर्माणका लागि जनस्वास्थ्य सरोकार टष्टसँग सम्झौता भएको बताए ।
स्वास्थ्यतर्फ नै प्रदेश सरकार मातहतका प्रादेशिक अस्पतालका साथे चार वटा निजी अस्पतालबाट १० वर्ष मुनिका बालबालिकाको निःशुल्क उपचार गराउने सम्झौताबमोजिम काम सुरु भइसकेको सुनाए ।
उनले सातवटै प्रदेशका मख्यमन्त्रीको हेटौँडा भेलाले संविधान कार्यान्वयनका लागि समन्वय र संघर्ष गर्ने निर्णय गरी प्रधानमन्त्री पुष्पकमल दाहाल प्रचण्डलाई ध्यानाकर्षणपत्र बुभझाएपछि प्रधानमन्त्रीबाट १५ दिनभित्र प्रहरी समायोजन गर्ने घोषणा भएर प्रक्रिया अघि बढ़ाइएको बताए ।
उनले भने, “संविधानको पूर्ण कार्यान्वयनका लागि बनाउन पर्ने कानुनको संघीय सरकारले सूची तयार गरी प्राथमिकता क्रम निर्धारण गरेको छ ।”
यस अवधिमा प्रदेश निजामती र स्थानीय सरकारी सेवाको सर्तसम्बन्धी ऐन निर्माण भइ कर्मचारी पदपूर्तिमा सहज भएको कार्कीले जनाए ।
उनले भने, “अब कर्मचारी भर्नाको बाटो खुला भएको छ । प्रदेश लोकसेवा आयोगमार्फत पदपूर्ति हुनेछ ।”
बजेटविहीनताको अवस्थालाई प्रतिस्थापन विधेयकमार्फत निकास दिएको, सभामुख चयन र संसदीय समितिको चयनलाई पनि सरकारले सय दिने उपलब्धिको रूपमा व्याख्या गरेको छ ।
यस अवधिमा कुल बजेट ३६ अर्ब ७४ करोड ३५ लाखमध्ये सात अर्ब ६६ करोड ७९ लाख रुपैयाँ खर्च भएको जनाइएको छ ।
आफूले सरकारको नेतृत्व गर्दा बजेट खर्च चार प्रतिशत रहेकोमा अहिले २१ प्रतिशत पुगेको मुख्यमन्त्री कार्कीले बताए । आयको प्राप्ति ३६ अर्ब रहेकोमा प्राप्ति १७ अर्ब ६२ करोड रहेको जनाइएको छ ।