टोकियो । जापानको राष्ट्रिय अन्तरिक्ष एजेन्सी (जाक्सा)ले ‘स्मल लुनार ल्यान्डिङ डेमोन्स्ट्रेटर (स्लिम)’ चन्द्रमामा अवतरण भएको शनिबार पुष्टि गरेको छ ।

स्थानीय समयानुसार शनिबार जापान एयरोस्पेस एक्सप्लोरेसन एजेन्सी (जाक्सा)ले एक अनलाइन वक्तव्यमा जापानी मानवरहित यान राति १२ बजेर २० मिनेटमा चन्द्रमामा अवतरण गरेको जनाएको छ । जाक्साले यानको अवतरणपछि सञ्चार स्थापित भएको पुष्टि गरेको छ ।

यद्यपि, अवतरणपछि चन्द्रमामा धेरै समय रहनका निम्ति तयार पारिएको सोलार ब्याट्रीको रिचार्ज हुन नसकेको उल्लेख छ । यानमा रहेको ब्याकअपको सहयोगमा चन्द्रमाका तस्बिर, चट्टान संकलन तथा अनुसन्धानका अरू गतिविधि भइरहेका जाक्साले जनाएको छ ।

“स्लिमको सोलार सेलले बिजुली उत्पादन गर्न नसक्ने भएकाले यसले ब्याकअप ब्याट्रीमा काम गरिरहेको छ, जुन घण्टौँसम्म मात्र टिक्छ,” जाक्साका अधिकारीले शनिबार आयोजित पत्रकार सम्मेलनमा भने ।

अवतरणपछि चन्द्रमाको सतहबाट तथ्यांक लिने काम जाक्साका निम्ति प्राथमिकतामा रहेको अधिकारीले बताएका छन् ।

स्लिमको अवतरणसँगै जापान अमेरिका, सोभियत संघ, चीन र भारतपछि चन्द्रमामा अवतरण गर्ने पाँचौँ मुलुक बनेको छ ।

चन्द्रमामा पहिलो मानव अवतरणको ५० वर्षभन्दा धेरै समयपछि धेरै मुलुक र निजी कम्पनीले यात्रालाई नयाँ बनाउने प्रयास गरिरहेका छन् । तर, र्क्यास ल्यान्डिङ, सञ्चारमा समस्या र अरू प्राविधिक समस्या व्याप्त छन् ।

यसै महिना अमेरिकी निजी कम्पनी एस्ट्रोबोटिकको पेरेग्रिन चन्द्र ल्यान्डरले उडान भरेपछि इन्धन चुहिएकाले उसको मिसन असफल भएको थियो । बिहीबार अन्तरिक्षयान फिर्ता हुने क्रममा पृथ्वीको वायुमण्डलमा जल्ने सम्भावनापछि दक्षिणी प्रशान्त महासागरमा उसको सम्पर्कविच्छेद भएको थियो ।

नासाले आफ्नो आर्टेमिस कार्यक्रमअन्तर्गत चालक दल भएको चन्द्र मिसनको योजना पनि स्थगित गरेको छ ।

यसअघि, एउटा सार्वजनिक र एउटा निजी गरी दुइटा जापानी यान चन्द्रमामा पठाउने दुईवटै प्रयास असफल भएका थिए ।

दुईवटा असफल चन्द्र अभियान र टेकअफपछि विस्फोटसहित हालैका रकेट असफलतापश्चात् अन्तरिक्षमा यो सफलताले उच्च प्रविधिको जापानी प्रतिष्ठालाई पुनःस्थापित गरेको छ । रासस/सिन्ह्वा