काठमाडौं । नेकपा (एकीकृत समाजवादी)का अध्यक्ष माधवकुमार नेपालले आफ्नै शक्तिमा चुनाव जित्ने गरी तयारी गर्नुपर्ने बताएका छन् ।

शनिबार काठमाडौंको साँखुमा अगुवा कार्यकता भेला तथा प्रशिक्षण कार्यक्रममा उनले यसअघि गठबन्धनको साथमा चुनाव लड्दा अपेक्षित नजिता हासिल गर्न नसकेको उल्लेख गरे । अब आफ्नै शक्तिमा चुनाव जित्ने गरी तयारी गर्नुपर्नेमा उनले जोड दिए ।

उनले सिंगो मुलुकको विकासको खाका आफ्नो पार्टीले तयार गरेको जिकिर गरे । नेता–कार्यकर्ताले जनतामाझ गएर त्यसलाई बुझाउन सक्नुपर्ने उनको भनाइ थियो ।

अध्यक्ष नेपालले सातै प्रदेशमा पार्टीको अस्तित्व देखिएको भन्दै अब पालिकामा देखिने गरी संगठन विस्तार गर्नुपर्ने बताए । अहिले सत्ता गठबन्धन फुट्ने भ्रममा नलाग्न उनले आग्रह गरे । गठबन्धन पाँचै वर्ष चल्ने उनले बताए ।

उनले यसअघि कम्युनिस्ट दलहरू बहुमतको नजिक पुगे पनि त्यसलाई जोगाउन नसकिएको दोहोर्‍याए । पुनः कम्युनिस्ट शक्तिलाई एकताबद्ध गर्न पहल भइरहेको उनले बताए । हिमालयन टेली भ्वाइस