काठमाडौं । प्रस्तावित न्यायाधीश सुनिलकुमार पोखरेलको संसदीय सुनुवाइ भएको छ । वरिष्ठ अधिवक्ताका रूपमा अभ्यासरत पोखरेल न्यायपरिषद्‌बाट सर्वोच्चको न्यायाधीशमा सिफारिस भएका छन् । उनले आफू न्यायाधीश भएपछि गर्ने कार्यसम्पादन र न्यायप्रतिको मान्यताका विषयहरू कार्ययोजनाका रूपमा राखेका छन् । उनले धारणा राखिसकेपछि सांसदले प्रश्न सोधेका छन् । 

यस्ता छन् प्रस्तावित न्यायाधीश पोखरेललाई सांसदहरूका प्रश्न 
जर्नादन शर्मा 
बारमा बसेर काम गर्नुभयो, बार र न्यायालय कहिले पुरक, कहिलेकाहीँ प्रतिपक्षी भएर गएको देखेका छौँ, आन्दोलन भएको देखेका छौँ । अब न्यायालयमा जाँदै गर्दा यो अनुभव कसरी लिनुहुन्छ ? समायोजन कसरी होला ? व्यवहारिक जीवनमा पहुँच नहुने मानिसहरू, गरिब तहकाले न्याय पाउन प्रमाण जुटाउन सक्दैन, प्रभाव पार्न सक्दैन, न्यायबाट बञ्चित हुन्छ । यसमा कसरी भूमिका खेल्नुहुन्छ ? 

महेशकुमार बर्तौला 
यहाँको बारेमा कुनै उजुरी छैन । यो राम्रो पाटो हो । न्यायालयमा तटस्थ भूमिका कसरी खेल्नुहुन्छ ? सर्वोच्च अदालतमा मुद्दाको चाङ छ । २८ हजार मुद्दा छन् । नवोदित कानुन व्यवसायीमा विश्वास छैन । नवोदितप्रति न्यायाधीशलाई नरूचाएको गुनासो छ । यसलाई कसरी लिनुहुन्छ ? २८ हजारमध्ये चारदेखि पाँच हजार मुद्दा प्रयोजनहीन मुद्दा  छ । यसलाई कसरी व्यवस्थापन गर्नुहुन्छ ? न्यायालयप्रति भरोसा गुमेको छ । वकिलहरू आफैँले बेन्चलाई ठिक फैसलामा गलत गर्न उत्प्रेरित गरेको भन्ने छ नि ? 

रमेशजंग रायमाझी 
१९ अर्ब जरिबाना असुल गर्नुछ भन्नुभयो । यो उठाउन राज्यले किन सकेन ? अदातलको भूमिका यसमा रहन्छ कि रहँदैन ? सदनमा न्यायालयको फैसला वा निर्णयको विषयमा बोल्न पाइँदैन भन्ने छ । सार्वभौम सदनले यसमा कुरा उठाउने अधिकार छ कि छैन ? 

पदम गिरी 
न्यायालयमा स्वच्छता र सुशासन कायम गर्न मूर्त यो यो काम गर्नेछ भन्ने कुरा के छ ? विश्वास दिने आधार के–के छ ? नेपालको न्याय सम्पादन प्रभावित हुन्छ भन्ने छ यसलाई भरोसायोग्य कसरी बनाउने ? तपाईंको उजुरी छैन, तपाईं योग्य देखिनुभयो ? 

रमेश लेखक 
अदालतको गरिमा बढाउने, साउथ एसियामा समयमा न्याय नपाउने समस्या देखिन्छ । दुई, चार वर्षमा परिणाममुखी काममा पुग्न सकिन्छ भन्ने ठोस योजना के छ ? 

देवेन्द्र दाहाल 
टिमवर्क कसरी हुन्छ ? धेरै पेसी तोकिने तर फैसला नआउने स्थिति छ । यसलाई कसरी व्यवस्थित गर्न सकिन्छ ? 

इश्वरी घर्ती 
सरकारी वादी मुद्दा र सरकारवादी फौजदारी मुद्दामा अपेक्षित नतिजा आएन भन्ने छ । कारण के होला ? 

इश्वरी देवी न्यौपाने 
सानालाई ऐन ठूलालाई चैन छ । न्यायालयमा आशा मरेको, बिचौलिया हाबी भएको छ । बाउको पालाको उजुरी नातिको पालामा पनि सकिँदैन । यो कसरी अन्त्य गर्ने ?