काठमाडौं । रुसी राष्ट्रपति भ्लादिमिर पुटिनले यसै वर्ष पश्चिमी सैन्य गठबन्धन उत्तर एट्लान्टिक सन्धि संगठन (नेटो)मा सामेल भएपछि छिमेकी फिनल्यान्डसँग समस्या सिर्जना हुन सक्ने चेतावनी दिएका छन् ।

फिनल्यान्ड नेटोमा सामेल भएसँगै उत्तरी युरोपको सुरक्षा स्थितिमा ठूलो परिवर्तन भएको छ । रुससँग नेटोको सिमाना एक हजार ३०० किलोमिटर थपिएको छ । नेटोको विस्तारको विरोधमा रहेका पुटिनका निम्ति यो चिन्ताको विषय थियो ।

“तिनीहरू (पश्चिमा) फिनल्यान्डलाई नेटोमा सामेल गराए । फिनल्यान्डसँग हाम्रो कुनै विवाद छैन । २०औँ शताब्दीको मध्यका सबै किसिमका क्षेत्रीय विवाद धेरै पहिले नै समाधान भइसकेका छन्,” आइतबार प्रकाशित एक अन्तर्वार्तामा पुटिनले भनेका छन्, “त्यहाँ कुनै समस्या थिएन, तर अब त्यहाँ समस्या हुनेछ । किनकि, अब हामी लेनिनग्रादलाई सैन्य जिल्ला बनाउनेछौँ र त्यहाँ सैन्य एकाइ थप्नेछौँ ।”

अमेरिकी राष्ट्रपति जो बाइडेनले केही समयअघि पुटिनले युक्रेनमा युद्ध जारी राखेमा अन्ततः नेटो सदस्यमाथि आक्रमण गर्ने र अमेरिकी सेनालाई द्वन्द्वमा तान्न सक्ने टिप्प्णी गरेका थिए । पुटिनले यो तथ्यहीन कुरा भएको र नेटो मुलुकसँग कुनै विवाद नरहेको एवं आक्रमण गर्ने विषय झुटो भएको बताएका छन् । सीएनएनबाट ।