काठमाडौं । सत्तारूढ दल नेपाली कांग्रेसको आसन्न महासमिति बैठकको तयारीमा केन्द्रीय पार्टीमात्र हैन केन्द्रीय नेताहरू पनि जुटेका छन् । नीति अधिवेशनको संज्ञा दिइएको पार्टीको महासमिति बैठक यहीँ पुस १६ देखि १९ गतेसम्म काठमाडौंमा आयोजना हुँदै छ । 

उक्त महाधिवेशनमा जनताको मत सर्वेक्षण गरेर आएका सुझावहरू बैठकमा प्रस्तुत गर्ने तयारीमा केन्द्रीय नेताहरू छन् ।

पार्टी केन्द्रीय सदस्य नैनसिंह महरले जनभावनाअनुसार पार्टीलाई अगाडि बढाउन आफूले प्रविधिको प्रयोग गर्दै गुगल फर्ममार्फत पार्टीका तल्लो पंक्तिको धारणा बुझ्ने काम अघि बढाएको बताए । 

उनले आएका सुझावहरू आफूले नीति महाधिवेशनमा जोडदारका साथ उठाउने बताए । “नीति महाधिवेशनमा कुन–कुन विषय उठाउनु पर्ला भनेर प्रविधिको प्रयोग (गुगल फर्म)का माध्यमबाट पार्टीका क्रियाशील सदस्य, शुभेच्छुक र जनतासँग आगामी नीति कस्तो बनाउने भन्ने बारेमा सुझाव माग गरेको छु,” उनले भने, “राजनीतिक दल कस्तो हुनुपर्छ भन्ने आम चासो हुन्छ । हामीले अधिकांश जनताको सुझाव लिनुपर्छ । पार्टीले नै यो काम गर्नुप¥यो । तर, ढिलो भइसकेकाले कसै न कसैले त गर्नै पर्ने भयो । त्यसैले मैले यो व्यवस्था गरेको हुँ ।”