काठमाडौं । परराष्ट्रमन्त्री एनपी साउद र कतारका प्रधानमन्त्री शेख मोहम्मद बिन अब्दुल रहमान अल–थानीबीच शिष्टाचार भेटवार्ता भएको छ ।
सोमबार कतारको राजधानी दोहामा भएको भेटमा परराष्ट्रमन्त्री साउदले हमासको नियन्त्रणमा रहेका नेपालका विपिन जोशीको शीघ्र रिहाइका लागि सशक्त पहल गरिदिन आग्रह गरेका थिए ।
परराष्ट्रमन्त्री साउदले हमाससँगको कतारको सम्पर्क, कतारले खेलिरहेको मध्यस्थकर्ताको भूमिका, कतार र नेपालबीचको सम्बन्धका आधारमा कतारसँग नेपाल सरकारले उच्च आशा गरेको बताएको उनका स्वकीय सचिव दिपक जोशीले जानकारी दिए ।
जवाफमा कतारका प्रधानमन्त्री अल थानीले विपिनसहित विदेशी बन्दीहरूको रिहाइका लागि कतार सरकारले उच्च प्रयास गरिरहेको बताएका थिए । उनले चाँडै सकारात्मक परिणाम आउन सक्ने संकेत गरेको जोशीको भनाइ छ ।
उनले नेपालसँगको सम्बन्धलाई कतार सरकारले प्राथमिकतामा रहेको पनि बताए ।
परराष्ट्रमन्त्री साउदले कतारका प्रधानमन्त्री अल थानीसँग व्यापार र लगानीका विषय, कतार फ्रन्ट फर डेभलपमेन्टबाट हुने विकास सहयोग, आगामी उच्चस्तरीय भ्रमणआदि विषयमासमेत कुराकानी गरेका थिए ।
