काठमाडौं । देशभर दैनिक एक हजार २०० युनिट रगत माग हुने गरेको नेपाल रेडक्रस सोसाइटीले जनाएको छ । काठमाडौंमा मात्रै दैनिक ३५० युनिट माग हुने गरेको छ ।

नेपाल रेडक्रस सोसाइटी, समन्वय सेवा विभागका निर्देशक दिव्यराज पौडेलका अनुसार देशभर पछिल्लो दुई वर्षमा दैनिक १२ सय युनिट रगतको माग भइरहेको छ । देशभर वार्षिक साढे चार लाख जनसंख्यालाई रगत आवश्यक पर्ने उनको भनाइ छ ।

माग हुनेमध्ये ८५ प्रतिशत रगत विभिन्न शिविरहरूमार्फत आपूर्ति र १५ प्रतिशत रक्तसञ्चार केन्द्रहरूमा नै आएर दान गर्नेहरूबाट संकलन गर्नुपर्ने अवस्था रहेको निर्देशक पौडेलले बताए ।

अहिले माग भएअनुसार रगतका लागि रक्तदाताको संख्या पर्याप्त नभएको पौडलको भनाइ छ ।

“नेपालमा कुल जनसंख्याको लगभग दुई प्रतिशत दाताको आवश्यकता पर्ने भएपनि अहिलेसम्म ०.९ प्रतिशतमात्रै पुगेको छ, सरकारले रगत व्यवस्थापनका लागि बजेट बढाउनुपर्ने आवश्यकता छ,” पौडेलले भने ।

बजारमा हाल रगतको अभाव भएको खबर सत्य नभएको नेपाल रेडक्रस सोसाइटीका कार्यवाहक महामन्त्री मनोजकुमार थापाले बताए । कुनै एउटा समूहको रगत कमी भएको बेलामा रगत नै अभाव भयो भन्ने भ्रम फैलाउने काम भएको उनको दाबी छ ।

चाडपर्वहरूमा रगत संकलनमा कमी आउने भएपनि अन्य समयमा खासै कमी नभएको उनको भनाइ छ ।

“रक्तदानका लागि रक्तदाता, समुदायमा रक्तदान गर्ने संघसंस्था र व्यक्तिलाई उत्प्रेरणा गर्नु आवश्यक छ, अहिले यो अलि कमी भएको हो की भन्ने महसुस भएको छ” थापाले भने ।

रगतका विभिन्न समूहमध्ये कुनै एउटा समूहको रगत अभाव हुँदा पुरै बजारमा अभाव भयो भन्ने प्रचार हुने भएकाले कुनै पनि प्रकारको रगत कमी हुन नदिन रेडक्रस लागि परेको उनको भनाइ छ । रगत व्यवस्थापनमा रक्तसञ्चार सेवा केन्द्रहरूको आपसी समन्वय आवश्यक रहेको पनि उनको जोड छ ।