काठमाडौं । स्वास्थ्य तथा जनसंख्या मन्त्रालयले एक सयदेखि तीन सयसम्म बेड भएका अस्पतालमा नर्सिङ र पारामेडिक्स पढाउन अनुमति दिने भएको छ ।
स्वास्थ्य तथा जनसंख्यामन्त्री मोहनबहादुर बस्नेतले मन्त्रालयस्तरबाट यस्तो निर्णय गरिएको बताए । उनले तीन सयभन्दा माथि रहेका अस्पतालमा एमबीबीएस पढाउन अनुमति दिने बताए ।
बुधबार मन्त्रालयमा आयेजित पत्रकार सम्मेलनमा निर्णय कार्यान्वयनका लागि सरोकारवालाहरूलाई पत्राचार गरिएको बताए ।
यसका लागि आवश्यक जनशक्ति, भौतिक संरचना तथा क्षमताबारे मन्त्रालयमा जानकारी गराउन चिकित्सा शिक्षा आयोग र प्रतिष्ठानहरूमा पत्राचार गर्ने तयारी गरिएको मन्त्री बस्नेतले बताए ।
राष्ट्रिय चिकित्सा शिक्षा ऐनमा आफ्नै एक सय बेड भएका अस्पतालहरूले मात्रै प्रमाणपत्र र तीन सय बेड अस्पताल भएका शिक्षण संस्थाहरूले स्नातक तह अध्यापन गराउन पाउने व्यवस्था छ ।
ऐन लागु भएयता पीसीएल नर्सिङ अध्यापन गराइरहेका ६६ वटा कलेज बन्द भएको सीटीईभीटीको तथ्यांक छ । हाल सीटीईभीटीका आंगिक, साझेदारी र निजी गरी देशभर पीसीएल नर्सिङ अध्यापन गराउने ५२ वटा कलेज सञ्चालनमा छन् ।
