विराटनगर । धनकुटा नगरपालिका–१, निगालेमा एक पुरुषले श्रीमती र छोराको हत्या गरेर आत्महत्या गरेका छन् ।
निगालेमा बस्दै आएका ३५ वर्षीय टिकाराम गुरुङले श्रीमती ३६ वर्षीया भीमा र छोरा १० वर्षीय आयुषको हत्या गरी आत्महत्या गरेका प्रहरीले जनाएको छ ।
संखुवासभाको चैनपुर नगरपालिकाका बासिन्दा उनी केही समयदेखि धनकुटाका मानिकलाल श्रेष्ठको खाली घरमा बस्दै आएका थिए । ज्यालामजदुरी गर्दै आएका गुरुङले मादकपदार्थ सेवन गरी घरायसी विवादमा घटना गराएको हुन सक्ने प्रहरीको प्रारम्भिक अनुमान छ ।
जिल्ला प्रहरी कार्यालय धनकुटाका प्रहरी उपरीक्षक कृष्णप्रसाद कोइरालाको टोली घटनास्थलमा पुगेको छ । मृतक गुरुङ सुत्ने कोठामा झुन्डिएको अवस्थामा मृत फेला परेका छन् । उनकी श्रीमती र छोराको शव हत्या गरिएको अवस्थामा फेला परेको प्रहरीको भनाइ छ ।
मृतक गुरुङकी कान्छी छोरी ६ वर्षीया आसिकी भने छिमेकीको घरमा सुत्न गएकाले बचेको बताइएको छ ।
