काठमाडौं । नेपाली कांग्रेसले भूकम्प प्रभावित जिल्लामा एक हजार अस्थायी आवास निर्माण गरेर हस्तान्तरण गर्ने निर्णय गरेको छ । पार्टीका भातृ तथा शुभेच्छुक संस्थाका स्वयंसेवी युवाको परिचालन गरी दुई हप्ताभित्र एक हजार अस्थायी आवास निर्माण गर्ने निर्णय गरेको हो ।

मंगलबार पार्टी केन्द्रीय कार्यालय सानेपामा महामन्त्री गगन थापाको नेतृत्वमा बसेको पदाधिकारी र केन्द्रीय सदस्यको बैठकले १० जनाका दरले २६ समूह परिचालन गरी दुई हप्ताभित्र एक हजार अस्थायी टहरा निर्माण गरी भूकम्प पीडितलाई छानामुनी बास बसाउने निर्णय गरेको हो ।

त्यसका लागि कांग्रेसले एकजना निर्माण विज्ञ र दुईजना मिस्त्रीसहित १० जनाका दरले एकपटकमा १३ समूह परिचालन गर्ने निर्णय गरेको छ । १३ समूह परिचालनका लागि एकजना केन्द्रीय सदस्य र जिल्लाबाट नेतृत्व तोक्ने पनि कांग्रेसको निर्णयमा उल्लेख छ ।

यस्तै, प्रजातान्त्रिक चिकित्सक संघको संयोजनमा भूकम्प प्रभावित क्षेत्रमा स्वास्थ्य शिविर संचालन गरी सामान्य र मानसिक स्वास्थ्य परिक्षणको प्रबन्ध मिलाउने पनि कांग्रेसको निर्णयमा उल्लेख छ । कांग्रेसको शुभेच्छुक संस्था शिक्षक संघको समन्वयमा रोकिएको पठन पाठन संचालनको व्यवस्था मिलाउने र नेपाल विद्यार्थी संघका तर्फबाट चारवटा विद्यालयका लागि अस्थायी संरचना बनाउने उल्लेख छ ।

नेविसंघका तर्फबाट दुईवटा विद्यालयका पक्की भवन आफ्नै खर्चमा बनाएर हस्तान्तरण गर्ने पनि नेपाली कांगेसको निर्णयमा उल्लेख छ । यस्तै, नेपाली कांग्रेसको भातृ संस्था नेपाल ट्रेड युनियन कांग्रेसका तर्फबाट भूकम्प प्रभावित क्षेत्रको अध्ययन गरी अति विपन्नहरूका लागि जीवन निर्वाहको व्यवस्था मिलाउने जिम्मेवारी तोकिएको छ ।

कांग्रेसले श्रमदानमा जाने स्वयंसेवीले आफ्नो खाने र बस्ने व्यवस्था आफैँले गर्नुपर्ने, भूकम्पपीडितलाई आर्थिक वा अन्य भार पुर्‍याउन नपाइने तथा आवास तथा विद्यालय निर्माणमा सरकारले दिएको राहत रकमको प्रयोग गर्न नपाउने पनि निर्देशिका बनाएको छ ।

यस्तो छ कांग्रेसको स्वयंसेवी आचासंहिता