काठमाडौं । इजरायलका प्रधानमन्त्री बेन्जामिन नेतान्याहुले हमासविरुद्धको युद्ध समाप्त भएपछि गाजामाथि अनिश्चितकालीन नियन्त्रण राख्ने बताएका छन् । नेतान्याहुले आफ्नो देशले गाजा क्षेत्रको ‘समग्र सुरक्षा जिम्मेवारी’ लिने बताएका छन् ।

यस्तै, उनले मानवीय सहायता र बन्दक निकाल्न केही समयका लागि आक्रमण रोके पनि युद्ध नरोकिने भनेका छन् ।

सोमबार प्रसारित एबीसी न्युजसँगको एक अन्तर्वार्तामा गाजामा युद्ध समाप्त भएपछि कसले ‘शासन’ गर्छ भनेर सोधिएको प्रश्नमा उनले ‘हमासको बाटो नपछ्याउनेले’ भन्दै जवाफ दिएका छन् ।

उनले भनेका छन्, “इजरायलले अनिश्चितकालका लागि समग्र सुरक्षा जिम्मेवारी लिनेछ । किनभने त्यो सुरक्षा जिम्मेवारी नहुँदा के हुन्छ भनेर हामीले देखेका छौँ ।”

अक्टोबर ७ मा हमासले इजरायलमा आक्रमण गरेपछि युद्ध सुरु भएको थियो । हमासको आक्रमणमा एक हजार ४०० बढीले ज्यान गुमाएको बताइएको छ भने, गाजामा १० हजार भन्दा बढी मानिसको ज्यान गइसकेको छ ।