काठमाडौं । नेकपा (एकीकृत समाजवादी)का सम्मानित नेता झलनाथ खनालले भ्रष्टाचारविरुद्ध सरकारले अघि सारेको अभियान प्रभावकारी हुन नसकेको बताएका छन् ।

पार्टीको समाजवादी जागरण अभियानअन्र्तगत आइतबार बुटवलमा आयोजित कार्यक्रममा बोल्दै नेता खनालले सुशासन र भ्रष्टाचारविरुद्ध सरकारले अभियान सुरु गरेपछि विभिन्न प्रकरणहरु बीचैमा तुहिएकाले सरकारको अभियान प्रभावकारी हुन नसकेको बताए ।

सुन तस्करी प्रकरणमा पनि मुख्य मान्छे नभएर भरियामात्रै समातिएको जिकिर गर्दै उनले समाजमा दलाल पूँजीवाद हावी भएका कारण चाहेर पनि मुलुकबाट भ्रष्टचार अन्त्य हुन नसक्ने बताए ।

खनालले अर्धसामन्ती व्यवस्था र अहिलेको पूँजीवादी व्यवस्था शोषणमूलक व्यवस्था रहेकाले समाजबिना देशलाई निकास दिन नसक्ने बताए । उनले देशमा रोजगार नहुँदा युवाशक्ति विदेशी भूमिमा पलायन हुनु परेको भन्दै देशमा नै रोजगारी सिर्जना गर्नुपर्ने अहिलेको आवश्यकता रहेको उल्लेख गरे ।

खनालले मुलुकमा रोजगारी वृद्धि, सुशासन, शिक्षा, स्वास्थ्य, कृषिलाई प्राथमिकीकरणलगायतलाई केन्द्रमा राखेर पार्टीले समाजवादी जागरण अभियान चलाइरहेको बताउँदै अभियानले मुलुकलाई निकास दिने दाबी गरे ।