![प्रधानसेनापति बेलायततर्फ प्रस्थान](https://12khari.top/uploads/posts/qfdg-1696747578.jpg)
काठमाडौं । नेपाली सेनाका प्रधानसेनापति प्रभुराम शर्मा बेलायततर्फ प्रस्थान गरेका छन् । औपचारिक भ्रमणका निम्ति उनी आइतबार त्यसतर्फ गएका हुन् ।
प्रधानसेनापतिलाई त्रिभुवन अन्तर्राष्ट्रिय विमानस्थलमा रक्षासचिव किरणराज शर्मा र बलाधिकृत रथी सरोजप्रताप राणाले बिदाइ गरे । त्यसअघि, प्रधानसेनापतिलाई जंगीअड्डामा सेनाको एक टुकडीले सम्मान गारत अर्पण गरेको थियो ।
भ्रमणका क्रममा उनले बेलायती समकक्षी जनरल सन्डर्ससँग शिष्टाचार भेटघाट गर्नेछन् । उनले बेलायती सेनाका अरू विशिष्ट व्यक्तिसँग पनि भेटघाट र गोरखा बटालियनको समेत भ्रमण गर्नेछन् ।
प्रधानसेनापतिको भ्रमणदलमा सैनिक तालिम महानिर्देशक उपरथी सन्तोषकुमार ढकाल र प्रधानसेनापतिका स्टाफ अधिकृत सहभागी छन् । उनको अनुपस्थितिमा बलाधिकृत रथी राणाले कायममुकायम प्रधानसेनापतिको कार्यभार सम्हाल्ने नेपाली सेनाले जनाएको छ ।
प्रधानसेनापति शर्मा यही असोज २७ गते स्वदेश फर्कने तय छ ।