काठमाडौं । नेपाल राष्ट्र बैंकका गभर्नर महाप्रसाद अधिकारी र नेपाल धितोपत्र बोर्डका अध्यक्ष रमेशकुमार हमालबीच सेयर बजार सुधारका विषयमा छलफल भएको छ । सोमबार राष्ट्र बैंकमा बजारमा भएको समस्या र त्यसको सुधारका विषयमा छलफल भएको बोर्डका अध्यक्ष हमालले जानकारी दिए ।

छलफलमा सेयर बजारमा कायम रहेको १२ करोडको सेयर धितो कर्जाको सीमाबारे पनि छलफल भएको उनले बताए ।

“हाल १२ करोड रहेको सेयर धितो कर्जाको सीमा व्यक्तिगततर्फ कति पुर्‍याउने र संस्थागततर्फ कति पुर्‍याउने भन्ने विषयमा पनि छलफल भएको छ,” उनले भने, “बजारमा कन्फिडेन्ट कम भएको छ । त्यसलाई कसरी बढाउने भनेर पनि छलफल भएको छ । सीमाको विषयमा राष्ट्र बैंकले सर्कुलरबाट प्रस्ट पार्ने छ ।”

भेटमा प्राइभेट इक्विटी फन्ड र भेन्चर क्यापिटलमा बैंक तथा वित्तीय संस्थालाई लगानी गर्न दिने विषयमा पनि छलफल भएको उनले बताए । प्राइभेट इक्विटी फन्डमा बैंकहरूलाई कुनै एउटा सीमा तोक्ने पनि छलफल भएको उनको भनाइ छ ।

राष्ट्र बैंकले दसैँ अगाडि नै सर्कुलर जारी गर्ने गरी तयारी गरिरहेको बताइएको छ ।