काठमाडौं । नेपथ्यले पहिलोपटक क्यानडाको संगीतयात्रा गर्ने भएको छ । निर्धारित तालिकाअनुसार अक्टोबर १ तारिखमा नेपथ्यले आफूलाई क्यालगरी सहरको 'दी प्यालेस थिएटर' मा उभ्याउनेछ । त्यसपछि अक्टोबर ४ तारिख, बुधबार ब्याण्डको प्रस्तुति भ्यानकुभर सहरको 'दी भोग थिएटर' मा हुनेछ । यी दुवै सहर क्यानडाको पश्चिमी भेगमा पर्छन् । यात्राको अन्तिम शो टोरन्टोका दर्शक माझ हुनेछ । अक्टोबर ८ तारिख ब्याण्ड टोरन्टोकै ‘म्यासी हल’मा प्रस्तुत हुनेछ ।

सन् २००२ मा नेपालयले व्यवस्थापन सम्हालेपछि नेपथ्यले हालसम्म १६ वटा देशको २८ सहरमा ७८ वटा कार्यक्रम गरिसकेको छ । क्यानडा नेपथ्यको १७ औं गन्तव्य राष्ट्र हुनेछ ।

केही समययता नेपालीका निम्ति क्यानडा आप्रवासनको आकर्षक गन्तब्य बन्दै आएको छ । त्यसमा पनि विशेषगरी अध्ययनका लागि त्यसतर्फ जाने नेपाली विद्यार्थीहको संख्या बर्षेनि बढ्दो छ । बढ्दो जनसंख्यासँगै यहाँका नेपाली संघसंस्थाले आयोजना गर्ने विभिन्न खाले सांगीतिक कार्यक्रमहरुको संख्या पनि नियमित बन्दै गएको छ ।

नेपालयले उचित व्यवस्थापनमार्फत नेपथ्यको प्रस्तुतिमा एकरुपता ल्याउनका लागि नेपालमा र विदेशमा नेपथ्यसँग अनुभव बटुलेका प्राबिधिकहरुलाई यात्रा टोलीमा सम्मिलित गर्दै आएको छ । अघिल्लो महिनाको श्रृंखलावद्ध जापान यात्रामा सम्मिलित ८ जना प्राविधिज्ञ एवं व्यवस्थापक र ६ संगीतकर्मी सहित जम्मा १४ जनाको टोली क्यानाडा यात्रामा समावेस हुने छन् ।

ब्याण्डका अगुवा एवं मुख्य गायक अमृत गुरुङले  प्रसंशकहरुले समूह बनाउँदै अर्कै सहरदेखिको लामो दूरी तय गरेर पायक पर्ने सहरमा कन्सर्ट हेर्न आउने जानकारी दिइरहेको भन्दै आभार प्रकट गरेका छन् ।

क्यानडाको तीनवटै कन्सर्टमा अमृतलाई ड्रमसेटमा ध्रुव लामा, किबोर्डमा सुरज थापा, बेस गितारमा सुबिन शाक्य, गितारमा निरज गुरुङ र मादलमा शान्ति रायमाझीले साथ दिनेछन् ।

क्यानडाका तीनवटै सहरहरुमा नेपथ्य कन्सर्टका निम्ति स्थानीय समय अनुसार बेलुकीको ५ बजे प्रवेश खुला गरिनेछ भने ७ बजे कन्सर्ट सुरु हुनेछ ।