काठमाडौं । काठमाडौं प्रहरीको विशेष टोलीले २५ भदौमा दुबई हुँदै हिमालयन एयरलाइन्सबाट काठमाडौं ओर्लिएका काभ्रेको खानीखोला गाउँपालिका–३ का २८ वर्षीय बाबुलाल दोङलाई पक्राउ गर्‍यो ।

प्रहरीले दुबईबाट अवैध सुन ल्याएको सूचना पायो । त्रिभुवन विमानस्थल जाँचपास गरेर बाहिरिएपछि दोङलाइ सडकमै खानतलासी गर्‍यो । प्रहरीले उनले सुनको लेदो बनाएर मलद्वारमा लुकाएको ९६० ग्राम सुन भेटेपछि उनलाई पक्राउ गरेको थियो ।

दोङलाई पक्राउ गरेको प्रहरीले सुनबारे सोधखोज गर्दा उनी भरिया मात्र भएको खुल्यो । दोङले ल्याएको सुन ‘रिसिभ’ गर्ने समूहको खोजी प्रहरीले गर्‍यो ।

प्रहरीले सुन ‘रिसिभ’ गर्ने काभ्रेको रोशी गाउँपालिका–३, घट्टेखोलाका ३३ वर्षीय जगत लामा र काभ्रेकै महाभारत गाउँपालिका–३ का ३६ वर्षीय मिङमा दोर्जे स्यान्तानलाई पक्राउ गर्न सफल भयो ।

प्रहरीको अनुसन्धानले सुन जगत लामा र काभ्रेको महाभारत गाउँपालिकाकै विकास योञ्जन लामाको भएको खुलाएको छ । जगत पक्राउ परे पनि विशाल फरार छन् । काठमाडौैं प्रहरी स्रोतका अनुसार, विकास लामा समूहले दुबई हुँदै विभिन्न व्यक्तिमार्फत महिनाको २० देखि ३० किलो सुन तस्करी गर्ने गरेको दाबी गरिएको छ ।

सुन तस्करीका लागि उनीहरूले काभ्रेबाट १५ देखि २० युवालाई नियमित दुबई पठाउने र फर्कंदा सुनको भरिया बनाउने गरेको तथ्य प्रहरीले खुलाएको हो । विकास लामा समूहले काभ्रेकै नवीन दोङलाई दुबईमा सुन पठाउने धन्दामा प्रयोग गर्ने गरेको पनि पाइएको परिसर प्रहरी स्रोतले बाह्रखरीलाई बतायो ।

कार छाडेर भागेका थिए विकास
दुबई हुँदै सुन ल्याएका बाबुलाल दोङलाइ प्रहरीले २५ भदौ बिहान ११ बजे पक्राउ गरेको थियो । जगत र मिङमा दोर्जेलाई भने प्रहरीले २६ भदौमा काठमाडौंको ढल्कुबाट पक्राउ गरेको हो ।

वाग्मती प्रदेश ०२०३० प ८५१७ नम्बरको बुलेट मोटरसाइकलमा जगत थिए । वाग्मती प्रदेश ०१२७ च ९९६० नम्बरको क्रेटा गाडीमा मिङमा र विकास थिए ।

प्रहरीले मिङमा र जगतलाई पक्राउ गर्न सफल भए पनि विकास कार नै छाडेर भागे । कारबाट भाग्दै गर्दा विकासले प्रहरीमाथि रड प्रहार गर्न खोजेको अनुसन्धानमा खटिएका प्रहरी अधिकारीको भनाइ छ ।

विकासको आपराधिक यात्रा सुन तस्करी मात्र होइन, यसअघि मोटरसाइकल चोरी मुद्दामा मकवानपुरको भीमफेदी कारागारमा बसेका थिए । उनी तीन वर्षअघि मात्र छुटेको प्रहरीले जनाएको छ ।

जेलबाट छुटेलगत्तै राजनीतिको आडमा विकासले आपराधिक गतिविधि तीव्र पारेका उनीनिकट बताउँछन् । ०७९ मा भएको निर्वाचनमा विकास नेपाली कांग्रेसमार्फत काभ्रे क्षेत्र नम्बर–१ ‘क’बाट प्रदेशसभा सदस्यका लागि समानुपातिकमा सिफारिसमा परेका थिए । त्यति बेला उनी प्रदेशसभा र प्रतिनिधिसभा सदस्य निर्वाचनका लागि ‘क’ क्षेत्रकै प्रचारप्रसार समिति संयोजक समेत थिए ।

कारबाट करोडौँको चेक बरामद
प्रहरीले विकास लामालाई पक्राउ गर्न असफल भए पनि उनले प्रयोग गर्ने गरेको कार बरामद गरेको छ । उक्त कारमा अरू व्यक्तिका करोडौँ रकमको चेक बरामद भएको काठमाडौं प्रहरी परिसरका प्रवक्ता एवं एसपी कुमोध ढुंगेलले जानकारी दिए ।

काभ्रे क्षेत्र नम्बर–१ ‘ख’का प्रदेशसभा सदस्य तथा वाग्मती प्रदेशको खानेपानी, सिँचाइ तथा ऊर्जामन्त्री तीर्थ लामाले दिएको ६ लाख रुपैयाँको चेक समेत विकासको कारमा फेला परेको छ । यसले मन्त्री लामाको भूमिका समेत शंकास्पद ठानिएको छ । मन्त्री लामाले भने विकाससँग लामो समयदेखि भेटघाट नभएकाले चेकबारे अनविज्ञता जनाए ।

उनले भने, “राजनीतिमा लागेको भाइ हो, दौडधुप पनि गर्छ, मैले चेक दिएको छैन । पहिलाकै हो कि ! मलाई थाहा भएन ।”

उनी नेकपा (एमाले)का उमेदवार चन्द्र लामालाई तीन मतान्तरले हराउँदै कांग्रेसबाट प्रदेश सदस्यमा निर्वाचित भएका थिए ।

काठमाडौं प्रहरीले पक्राउ गरेका बाबुलाल दोङसहित तीनजनालाई विमानस्थल भन्सार कार्यालयमा बुझाएको छ । तर, तस्करीको थप अनुसन्धान गर्नुपर्ने देखिएपछि काठमाडौं प्रहरीले भन्सार कार्यालयलाई अनुसन्धानका लागि पक्राउ परेका व्यक्तिलाई पुनः प्रहरीलाई पठाइदिन आग्रह गरेको छ ।

परिसरका एसपी ढुंगेलले भने, “हामी तस्करीको अनुसन्धान गरिरहेका छौँ । एकजना पक्राउ परेलगत्तै विमानस्थल भन्सारलाई बुझाएका थियौँ । तर, अनुसन्धानका क्रममा धेरै खुल्ने देखिएपछि हामीले फेरि अनुसन्धानका लागि मागेका छौँ ।”

प्रहरी स्रोतका अनुुसार, पक्राउ परेका बाबुलालले उक्त सुन विकासको रहेको बयानमा पोलेका छन् । प्रहरीको अनुसन्धानले समेत सुनमा लगानी विकासले नै गर्ने गरेको देखिएको छ ।