काठमाडौं । नेकपा (एकीकृत समाजवादी)का सम्मानित नेता झलनाथ खनालले देशको राष्ट्रियता खतरामा परेको टिप्पणी गरेका छन् । आइतबार काठमाडौंमा आयोजित एक कार्यक्रममा उनले यस्तो बताएका हुन् ।

राष्ट्रियतामाथिको खतरा विभिन्न खालका सन्धि, सम्झौताका कारण उत्पन्न भएको उनले उल्लेख गरे । अमेरिकी आर्थिक सहयोग परियोजना एमसीसीका कारण पनि देशको राष्ट्रियता खतरामा रहेको उनले बताए । एमसीसी अमेरिकाले खडा गरेको ‘इन्डोप्यासिफिक स्ट्राटेजी’ भएको उनको भनाइ छ ।

एमसीसी संसद्बाट अनुमोदन गर्ने क्रममा व्याख्यात्मक घोषणा भनिए पनि त्यसलाई अमेरिकाले नमान्ने उनले बताए । उनले अहिलेसम्म नेपालले पठाएको भनेको व्याख्यात्मक घोषणा अमेरिकाले लागु नगरेको जिकिर गरे ।

५०० मिलियन डलर मात्र नभइ ५५ अर्ब दिए पनि आपत्ति नरहेको तर अमेरिकाले अघि सारेको सर्त मान्य नहुने उनले चेतावनी दिए । नेपालमा एमसीसी कार्यान्वयन भइसकेपछि अमेरिकाले ल्याउने नागरिकको केही पनि चेकजाँच गर्न नमिल्ने उनले सुनाए ।

“आज देशमा हेर्नुहोस्, देशको राष्ट्रियता त्यत्तिकै खतरामा बढिरहेको छ, राष्ट्रियतामाथिको खतरा । चाहे विभिन्न खालका सन्धि, सम्झौताहरू हुन्, चाहे यी नयाँनयाँ जस्तो, एमसीसी भन्नुस् । एमसीसी अमेरिकी साम्राज्यवादले खडा गरेको जुन इन्डोप्यासिफिक स्ट्राटेजी हो, त्यसको अभिन्न अंग हो । त्यो अभिन्न अंगको रूमपा उसले हरप्रकारले लाद्न कोसिस गर्दै छ । अब अहिले पनि त्यसलाई कार्यान्वयन गर्ने जोड अमेरिकाले दिइरहेको छ । तर, के कस्ता रेसिडेन्टहरू हुन्छन्, नेपालमा त्यो थाहा छैन । अनुमोदन गर्ने क्रममा व्याख्यात्मक घोषणा भनेर गरियो । त्यो व्याख्यात्मक घोषणाका कुराहरू लागु भए कि भएनन् ? पक्कै लागु भएको छैन,” उनले भने, “यी कुरालाई अमेरिकाले सुन्ने पनि छैन । एउटा कानले पनि सुनेको छैन । सम्झौतामार्फत नेपालले पाउने जम्मा ५०० मिलियन डलर हो । त्यो डलर प्राप्त गर्ने कुरामा कुनै आपत्ति छैन । अमेरिकाले नेपाललाई अनुदान दिन चाहन्छ भने ५५ करोड किन, ५५ अर्ब दिए पनि हुन्छ । तर, सर्तहरू जुन ढंगले लाद्न खोजिएको छ, त्यो एउटा सर्त पनि मान्य हुँदैन । कार्यान्वयन गर्दा मान्छे लिएर आउँछन्, त्यो मान्छेलाई नेपालले कुन देशको नागरिक हो तपाईं भनेर सोध्न पाउँदैनन् । ब्यागमा के लिएर आउँछन्, त्यो हेर्न मिल्दैन । यस्ता सर्त त्यसभित्र छन् ।”

नेता खनालले विगत केही समयदेखि नेपालको विदेश नीति असन्तुलित भएको टिप्पणी गरे ।