काठमाडौं । अर्बपति मुकेश अम्बानीको रिलायन्स इन्डस्ट्रिजले भारतमा डाटा सेन्टरको निमार्णका लागि १० अर्ब भारतीय रुपैयाँ (भारु) लगानी गर्ने भएको छ । अम्बानीको रिलायन्स इन्डस्ट्रिजले दुई विदेशी कम्पनीसँगको सहकार्यमा १२ करोड २० लाख अमेरिकी डलर लगानी गर्न लागेको हो ।

गत साताको सोमबार रिलायन्सले संयुक्त लगानीको उद्यमलाई डिजिटल कनेक्सन नाम दिइने घोषणा गरेको थियो ।

अम्बानीको रिलायन्ससँगै साझेदार दुई विदेशी कम्पनीमा क्यानडा आधारित ब्रुकफिल्ड इन्फ्रास्ट्रक्चर र अमेरिकाको डिजिटल रियल्टी ट्रस्ट रहेका छन् । यी प्रत्येक कम्पनीको ३३.३ प्रतिशत लगानी रहने फाेर्ब्सले उल्लेख गरेको छ ।

कम्पनीहरूले संयुक्तरूपमा हाल चेन्नई र मुम्बईमा डाटा सेन्टर बनाइरहेका छन् । चेन्नईमा १०० मेगावाटको डाटा सेन्टर यसै वर्ष सकिने र मुम्बईमा ४० मेगावाटको डाटा सेन्टर बनाउन कम्पनीहरूले २.१५ एक्कड जमिन अधिग्रहण गरेको घोषणा गरेका छन् ।

डिजिटल रियल्टीका लागि एसिया प्यासिफिककी प्रबन्ध निर्देशक एवं प्रमुख सेरेन नाहले डाटा सेन्टर उद्योगमा खुल्न बाँकी रहेको देश भएको बताएकी छन् । विश्वको सबैभन्दा धेरै जनसंख्या र भारतको डिजिटल बजारले डाटा सेन्टरको आवश्यकता देखाएको उनको भनाइ छ ।

डाटा सेन्टरले भारतमा स्ट्रिमिङ र गेमिङजस्ता विभिन्न डिजिटल सेवाका क्षेत्रमा सहजता प्रदान गर्ने छ ।

यसअघि  जुन महिनामा अर्का भारतीय अर्बपति गौतम अडानीले नोयडा र चेईइमा डाटा सेन्टरमा २१ करोड ३० लाख अमेरिकी डलर लगानी गर्ने बताएका थिए ।

विश्वभर डिजिटल प्रविधिको बढ्दो प्रयोगले डाटा सेन्टरको विकासलाई समेत गति दिन थालेको छ । भारतलाई समग्ररूपमा उदीयमान अर्थतन्त्रका रूपमा विश्वले हेरिरहँदा डाटा सेन्टरको बिजनेसले पनि भारतमा गति लिन थालेको देखिन्छ । 

फोर्ब्सबाट ।