काठमाडौं । नेकपा (माओवादी केन्द्र)का अध्यक्ष समेत रहेका प्रधानमन्त्री पुष्पकमल दाहाल ‘प्रचण्ड’ले भ्रष्टाचारविरुद्धको अभियान अघि बढ्दै जाने बताएका छन् ।

आइतबार ललितपुरको च्यासलमा समाजवादी मोर्चाले आयोजना गरेको कार्यक्रममा उनले बेथितिविरुद्ध ‘जेहाद’ छेडिएको बताए ।

“भ्रष्टाचारविरोधी या राज्यको सम्पत्ति व्यक्तिले दोहन गर्ने, शोषण गर्ने बेथितिका विरुद्ध या तस्करीका विरुद्ध एउटा जेहाद छेडिएको छ,” उनले भने, “यो कदम यही रोकिनेवाला छैन । यो कदम निरन्तर अघि बढ्नेवाला छ ।”

उनले यो कुनै आवेग र ‘स्टन्ट’ नभएको पनि बताए । “कुनै आवेगको कुरा होइन । यो राजनीतिक स्टन्टको कुरा होइन,” प्रधानमन्त्री प्रचण्डले भने ।

उनले आउँदा दिनमा अरू फाइल खोल्दै जाने उल्लेख गरे । “आउने दिनमा हेर्दैैैैै जानुहोला, अरू फाइल खुल्दै जानेवाला छन्,” उनले भने ।

जनता पनि साथमा भएपछि ‘ब्याटल’ जितिने उनको भनाइ छ  । ब्याटलमा लामबद्ध हुन उनले आग्रह पनि गरे । नयाँ युगको परिकल्पना साकार पार्न सबैको साथ आवश्यक रहेको उनले बताए ।

सत्ता गठबन्धनमा फाटो ल्याउन समाजवादी मोर्चाका नेताहरूमा भ्रम सिर्जना गर्ने षड्यन्त्र भइरहेको जिकिर उनले गरे । एकार्कालाई विश्वास दिलाउँदै अघि बढ्ने उनले स्पष्ट पारे ।