काठमाडौं । नेकपा (एमाले)ले सुन तस्कारी प्रकरणमा गृहमन्त्री नारायणकाजी श्रेष्ठले राजीनामा दिनुपर्ने माग गर्दै अवरोध गर्ने चेतावनी दिएपछि राष्ट्रियसभाका अध्यक्ष गणेशप्रसाद तिमिल्सिनाले बैठक नै स्थगित गरेका छन् ।

राष्ट्रियसभामा एमाले संसदीय दलका नेता देवेन्द्र दाहालले बिहीबार मिटरब्याजसम्बन्धी विधेयकबाहेक कुनै पनि विषय अघि नबढाउन माग गरे । अरू विषय अघि बढाइए बैठक चल्न नसक्ने उनले चेतावनी दिए । त्यसपछि अध्यक्ष तिमिल्सिनाले प्रमुख प्रतिपक्ष दलको मागअनुरूप नै बैठक सञ्चालन गरे ।

बैठकमा कानुन, न्याय तथा संसदीय मामिलामन्त्री धनराज गुरुङले मिटरब्याज नियन्त्रणका लागि ल्याइएको मुलुकी देवानी संहितासहित केही नेपाल ऐनलाई संशोधन गर्नेसम्बन्धी विधेयकका विषयमा धारणा राखेका थिए । त्यसपछि प्रतिनिधिसभाबाट सन्देशसहित आएको उक्त विधेयक टेबुल गरिएपछि बैठक ३१ मिनेटका लागि स्थगित गरिएको हो ।

एमाले संसदीय दलका नेता दाहालले सुन तस्करीको संरक्षक गृहमन्त्री र सरकार भएको आरोप लगाए । गृहमन्त्रीले राजीनामा दिनुपर्ने उनले माग गरे । उनले गृहमन्त्री पनि अनुसन्धानको दायरामा तानिनुपर्नेमा जोड दिए ।

“सभामुख महोदय, साउत ४ गते राष्ट्रियसभाको बैठक पनि थियो । त्यस दिन राजीनामा दिएको भए नैतिकताको विषय हुन सक्थ्यो । तर, अब यो नैतिकताको विषय रहेन । गृहमन्त्री समेत अनुसन्धानको दायरामा तानिनुपर्छ,”  उनले भने, “गृहमन्त्री बहाल राखेर यसको अनुसन्धान हुने अपेक्षा गर्न सकिएन । अब गृहमन्त्रीको राजीनामा अनिवार्य छ ।”

करिब १०० किलो सुन तस्कारी प्रकरणमा सरकारले गर्ने अनुसन्धानको विश्वसनीयता नरहने भन्दै उनले उच्चस्तरीय न्यायिक छानबिन समिति गठन गर्न समेत माग गरे ।

“यो सरकार र यस मातहतका संयन्त्रबाट अब निष्पक्ष छानबिनको अपेक्षा गर्न सकिँदैन । किनभने, गृहमन्त्री नै सुन तस्करीको संरक्षक हुन्,” दाहालले भने, “त्यसकारण उच्चस्तरीय न्यायिक छानबिन समिति बनाउनुपर्छ । विश्वासिलो संसदीय समिति बन्छ भने राष्ट्रियसभाको सहभागिता हुनुुपर्छ । त्यसो भएन भने यो बैठक चल्छ जस्तो मलाई लाग्दैन ।”

पहिले बनाइएको संसदीय समितिले ‘एउटा मुसा समेत खोज्न नसकेका’ उनको भनाइ थियो ।

यही साउन ३ गते त्रिभुवन अन्तर्राष्ट्रिय विमानस्थल भन्सार कार्यालयबाट जाँसपास भएर बाहिरिइसकेको करिब १०० किलो सुन राजस्व अनुसन्धान विभागको टोलीले बरामद गरेको थियो ।