काठमाडौं । प्रमुख प्रतिपक्ष दल नेकपा (एमाले)का अध्यक्ष केपी शर्मा ओलीले त्रिभुवन अन्तर्राष्ट्रिय विमानस्थलबाट करिब एक क्विन्टल सुन बाहिरिएको बारेमा उपप्रधान एवं गृहमन्त्री नारायणकाजी श्रेष्ठले दिएको अभिव्यक्तिप्रति आपत्ति जनाएका छन् ।

कम्बोडियाको भ्रमण गरेर सोमबार राति स्वदेश फर्किएसँगै त्रिभुवन अन्तर्राष्ट्रिय विमानस्थलमा सञ्चारकर्मीसँग कुरा गर्दै उनले गृहमन्त्री गैरजिम्मेवार बनेको आरोप लगाए । उनले गृहमन्त्रीले सुन तस्करीमा आफ्नो संलग्नता छ/छैन भन्ने प्रमाणित गर्नुपर्ने र आफ्नो संलग्नता नभए कसको छ बताउनुपर्नेमा उनले जोड दिए ।

उनले ‘विमानस्थलमा गृह मन्त्रालयले सुरक्षाकर्मी राखेको छ कि छैन ?’ भन्दै प्रश्न गरे । गैरजिम्मेवार अभिव्यक्ति दिँदै नहिँड्न उनले गृहमन्त्री श्रेष्ठलाई चेतावनी दिए ।

‘कसैले गृहमन्त्रीको जवाफदेहीको कुरा उठायो भनेर गृह मन्त्रायल मुद्दा हाल्न जानु कति न्यायसंगत हुन्छ ?’ भन्दै पनि उनले प्रश्न गरे ।

एक सञ्चारमाध्यमले उक्त सुन तस्करी प्रकरणको समाचारमा आफ्नो फोटो राखेको भन्दै उनले आपत्ति जनाए । नेपाल च्याम्बर अफ कमर्सको अधिवेशनमा खिचिएको फोटो जोडेर आफ्नो भ्रामक प्रचार गरिएको उनको भनाइ छ ।

अध्यक्ष ओलीले सुनकाण्डको सिलसिलाको कारबाही अन्तिमसम्म नपुर्‍याई एमालेले नछोड्ने पनि बताए । सुन बोक्ने भन्दा पनि बोक्न लगाउनेहरुलाई समातेर कारबाही नगरेसम्म एमाले चुप लागेर नबस्ने उनले चेतावनी दिए ।

“...नारायणकाजी श्रेष्ठ गृहमन्त्री हुनुहुन्छ, हाम्रो । उहाँले यहाँ (विमानस्थल) सेक्युरिटीको बन्दोबस्त गरेको छ कि छैन ? एयरपोर्टमा सेक्युरिटी गर्ने काम उहाँको हो कि होइन ? यहाँको आउने–जाने चिजको निरीक्षण गर्ने काम उहाँको हो कि होइन ? क्विन्टलका क्विन्टल सुन बाहिर जान्छ, गृहमन्त्री टारको गालामा गएर काँक्रोको बियाँ अर्काको गालामा टाँस्नुहुन्छ । यो अनैतिक क्रियाकलाप हो,” उनले भने, “गृहमन्त्रीको क्रियाकलाप गैरजिम्मेवार, आफू गृहमन्त्री भएर यसको भए पनि, उसको भए पनि यस्ता खालका गैरजिम्मेवार कुरा गरेर हिँड्ने गृहमन्त्रीले ? गृहमन्त्रीले बताउनुपर्छ, उहाँको संलग्नता छ कि छैन ?”

उनले आशंका पनि व्यक्त गरे । “सानोतिनो संलग्नताबाट त यो काम भएको छैन होला, उहाँको चाहिँ संलग्नता भएको छ कि छैन ? छैन भने कसको संलग्नता छ, को छ यसमा ? यत्तिकै कोटका गालामा काँक्राको बियाँ टास्ने होइन । म उहाँलाई सचेत गराउन चाहन्छु, गृहमन्त्रीको हैसियतले उहाँले बोल्दा तरिका पुर्‍याएर बोल्नुपर्छ । बत्तमिज हुनु एउटा कुरा हो, तर यो त बत्तमिजीको कुरा मात्रै होइन, गैरजिम्मेवार हद भयो यो,” अध्यक्ष ओलीले भने, “जथाभावी बोल्ने गृहमन्त्री भएर ? जथाभावी बोल्न गृहमन्त्रीलाई छुट छ ? अनि, अर्को कसैले गृहमन्त्रीको जवाफदेहीको कुरा उठायो भने मुद्दा हाल्न जाने अरूलाई ? गृहमन्त्रीमाथि मुद्दा हाल्ने कि नहाल्ने ? गृहमन्त्रीले कोर्ट र टारका सम्बन्धमा चर्चा गरेको अर्थ के हो ?”

उनले थपे, “सुनकाण्डको सिलसिला अन्तिमसम्म नपुर्‍याईकन हामी पनि छोड्दैनौँ । गृहमन्त्रीलाई थाहा होस्, यो गृहमन्त्रीसम्म पुगोस्, कहीँ भए पनि । पहिला पनि सुनकाण्ड तस्करी हुने गरेको थियो, खनेर निकालेको हो हामीले । फेरि पनि यस्ता कुरालाई हामी खनेर ननिककालेसम्म छोड्दैनौँ । यसमा कारबाही के हुन्छ, कसमाथि कारबाही हुन्छ, हेरिरहेका छौँ । बोक्न त प्लेन, गाडी भरियाले बोक्यो होला, तर बोकाउने को ? कसले बोकायो ? त्यसकारण यो ढाकछोप हुन सक्दैन ।”

सुन समातिएपछि गृहमन्त्री श्रेष्ठले विमानस्थल भन्सार र अध्यागमनको निरीक्षण गर्ने क्रममा बालुवाटार र बालकोटप्रति संकेत गर्दै ‘कुनै पनि टार, कोट र पार्टीले छानबिन रोक्न नसक्ने’ अभिव्यक्ति दिएका थिए । सोही अभिव्यक्तिलाई लिएर अध्यक्ष ओलीले गृहमन्त्रीलाई अनुसन्धान गर्न पूर्ण अधिकार रहेको तर प्रमाणबिना गैरजिम्मेवारी अभिव्यक्ति दिँदै हिँड्न नहुने बताए ।