काठमाडौं । वीर अस्पतालमा साउन १ गते (भोलि)देखि ओपीडी सेवा ८ देखि ४ बजेसम्म सञ्चालन हुँदै छ । चिकित्सा विज्ञान राष्ट्रिय प्रतिष्ठान (न्याम्स)ले असार २२ गते गरेको वीर अस्पतालमा बिहान ८ बजेदेखि ओपीडी सेवा सञ्चालन गर्ने निर्णय भोलिदेखि कार्यान्वयनमा आउन लागेको हो ।

तर, न्याम्स अन्तर्गतका केही चिकित्सकले भने यो निर्णय अव्यवहारिक भएको बताएका छन् । न्याम्सका प्राध्यापकहरूको संस्था फ्याकल्टी डक्टर्स एसोसिएसन (एफडीए)ले त विज्ञप्ति नै जारी गरेर निर्णयको विरोध गरेको छ । 

एफडीएले ‘सबैजसो विभागहरूको बिहानको अडिट र क्लिनिकल कक्षाहरू बिहान ८ बजे नै सुरु हुने भएकाले सोही समयमा ओपीडी सुरु गर्दा कक्षाहरूमा असर पर्ने’ जनाएको छ । 

एफडीएले नयाम्सको निर्णयप्रति असहमति जनाउँदै सच्याउन आग्रह गरेको छ । एफडीएका उपाध्यक्ष डा. सुधांसु केसी न्याम्सले चिकित्सकहरूलाई समय नै नदिई हतारमा निर्णय गरेकाले कार्यान्वयनमा समस्या पर्ने बताए ।

“बिहान ८ बजे ओपीडी सेवा सुरु गरेर मात्रै बिरामीले सेवा पाउँछन् नै भन्ने यकिन गर्न सकिँदैन । बरु बिहान हाजिर गरेर नियमित काममा नआउने कर्मचारीलाई कारबाही, समयमा कर्मचारीको तलब भुक्तानीजस्ता कामहरूमा सुधार गर्न सकिन्थ्यो,” डा. केसीले बाह्रखरीसित भने । 

यता प्रशासनतर्फका कर्मचारी पनि भोलिदेखि नै बिहान ८ बजे ओपीडी सेवा सुरु गर्न तयार देखिएका छन् । वीर अस्पताल कर्मचारी युनियनका सचिव दीपक मुडभरी न्याम्सले गरेको निर्णयमा आफूहरूको कुनै विमति नरहेको बताए ।

“८ बजेदेखि ओपीडी सेवा सुरु गर्ने कुरामा कर्मचारीको तर्फबाट कुनै आपत्ति छैन । हामी त तयार नै छौँ, ” मुडभरीले भने । 

न्याम्सका उपकुलपति डा. भुपेन्द्र बस्नेत भने न्याम्सले अस्पताल प्रशासन, चिकित्सकहरूको फ्याकल्टी तथा कर्मचारी संगठनहरूसँगको छलफलबाट बिहान ८ बजेदेखि ओपीडी चलाउने निर्णय गरेको दाबी गर्छन् । यो निर्णय भोलिदेखि जसरी पनि लागु हुने उनको तर्क छ । 

“कुनै नयाँ निर्णय गर्दा केही व्यक्तिहरूको असहमति हुनु स्वाभाविक हो । तर, बहुमत चिकित्सक कर्मचारीहरूको सहमति छ । भोलिदेखि नै यो सेवा सुरु गर्छौं,” डा. बस्नेतले बाह्रखरीसँग भने । 

यस निर्णयले सर्वसाधारलाई ठुलो राहत पुग्ने उनको विश्वास छ ।