काठमाडौं । पाँचौँ ‘रेडियो कान्तिपुर नेसनल म्युजिक अवार्ड’ मा गीतकार यादव खरेललाई दीर्घ साधना (लाइफटाइम अचिभमेन्ट) अवार्ड प्रदान गरिएको छ । बिहीबार सम्पन्न अवार्ड वितरण कार्यक्रममा गीतकार खरेलललाई ट्रफीसहित पुरस्कार रकम नगद एक लाख रुपैयाँ प्रदान गरिएको छ । 

विभिन्न १५ विधाका विजेताहरूलाई पनि अवार्ड वितरण गरिएको छ । 

उत्कृष्ट नव गायक/गायिकाको अवार्ड ‘रेलको बाटो’ बाट सुरज पण्डितले जिते भने उत्कृष्ट रचानातर्फ ‘हर्क शाउद’ले ‘घुमीघुमी’ गीतबाट अवार्ड जितेका छन् । 

उत्कृष्ट संगीत निर्देशकतर्फ हरि लम्सालले अवार्ड हात पारे । 

सम्झना भण्डारीले उत्कृष्ट लोकदोहरी गायिका र गायकतर्फ प्रकाश सपूतले अवार्ड जिते । उनीहरुले यो अवार्ड ‘पीर’बाट जितेका हुन् । 

उत्कृष्ट पार्श्व गायिकातर्फ अस्मिता अधिकारीले ‘बाबरी रंग’ बाट अवार्ड जितिन् भने रवि ओडले ‘ए मेरो हजुर’ बाट उत्कृष्ट पार्श्व गायकतर्फको अवार्ड हात पारे । 

उत्कृष्ट राष्ट्रिय संगीत विधाको अवार्ड गीतकार शान्तिराम भट्टराईले जिते ।  

उत्कृष्ट पप गायिकामा सुवानी मोक्तान दरिँदा पप गायकतर्फको अवार्ड स्वप्न सुमनको हातमा पुग्यो । 

उत्कृष्ट सांगीतिक समूहतर्फको अवार्ड अनुप्रस्थले पाउँदा उत्कृष्ट युगल गीतको विधामा महेश काफ्ले र अस्मिता अधिकारीले अवार्ड हात पारे । 

उत्कृष्ट आधुनिक गायकतर्फ राज सिग्देलले अवार्ड हात पार्दा उत्कृष्ट आधुनिक गायिकाको अवार्ड रचना रिमालको पोल्टामा पर्‍यो । 

पिपुल च्वाइस अवार्ड सुशान्त केसीले पाएका छन् ।