काठमाडौं । नेकपा (एकीकृत समाजवादी)का सांसद प्रेम आलेले गएको वर्ष ‘अर्थ मन्त्रलायमा तार काट्ने मुसा योपटक पशुपतिनाथमा छिरेको’ बताएका छन् । बिहीबारको प्रतिनिधिसभा बैठकमा उनले यस्तो टिप्पणी गरेका हुन् ।

“गत वर्ष अर्थ मन्त्रालयमा तार काट्ने मुसा यसपटक पशुपतिनाथमा छिरेको छ  । पहिलोपटक २०७९ माघ १४ गते तार काटियो,” पूर्वपर्यटनमन्त्री समेत रहेका आलेले भने, “परिषद् सदस्यको समितिमा छानबिन समिति गठन भयो । प्रतिवेदनले सत्यतथ्य पत्ता लगायो ।”

तर, तार काट्ने मुसालाई नसमातिएको उनको भनाइ छ । “तर, पर्यटनमन्त्रीले तार काट्ने मुसालाई नसमातेर छानबिन समितिका सदस्य देवी बराललाई समितिबाट हटाउने काम गरियो । प्रतिवेदन लुकाइयो । चोरलाई संरक्षण गरियो,” आले भन्छन् ।

उनले पशुपतिनाथको घ्याम्पे, दनापेटिका चोरी भएको पनि बताए । सांसद आलेले भने, “मूर्ति तथा बहुमल्य वस्तु चोरिएको छ ।”

पशुपति क्षेत्र विकास कोषका पदाधिकारी, मन्त्री मस्त निद्रामा रहेको उनको टिप्पणी छ ।

सो कोषअन्तर्गत गोठाटारको ५३५ रोपनीमध्ये ५०४ मात्र हाल साविक गरिएको आरोप उनले लगाए । ३१ रोपनी जग्गा हडपिएको प्रतिवेदन बाहिर ल्याउनेलाई स्पष्टीकरण सोधिएको उनले बताए ।

नेपाल वायुसेवा निगमले तीन महिनामा नाफा कमाएको भनेर झुट बोलेको उनको भनाइ छ । उनले निगमको यथार्थ आर्थिक अवस्थाबारे जानकारी गराउन समेत माग गरे ।